林保怡床前一吻淚別慈母
林保怡在圈中出名孝順，有雜誌曾以孝順為題邀約訪問，但遭保怡拒絕。在這個港孩當街謾罵父母的年代，保怡堅持為人子女理應孝順父母，毋須刻意着墨，只是林媽媽逝世雖已四載，保怡還是不時想念。
我係家中獨子，父母待我好好。我未出世前，媽媽幫駐港英軍照顧年幼子女，但佗住我就做全職媽媽。媽媽從英軍身上學到對人要有禮貌、自行解決到的事決不麻煩別人等，深深影響我，我從她身上學到好多，直到她離世那天。
沉痛心情拍劇
記得07年6月4日，我拍緊《珠光寶氣》，媽媽身體已經轉差，當媽媽消化系統受破壞，要插鼻喉灌營養，我好心痛，但都抽時間買輪椅、呼吸機，等媽媽病得冇咁辛苦，後來個劇去法國拍外景，我同媽媽講：「媽媽，我去拍劇一個月，你要等我返呀，知唔知？」媽媽雖然中風，木無表情，但我知佢知我講乜。
7月3日，我返到香港，媽媽情況已經好唔得，我趕到醫院，睇住心跳機慢慢變直線，我眼淚好似決堤咁，錫了媽媽額頭一啖，叮囑她「一路好走」後，我打電話返無綫請假，第二日獨自辦理媽媽身後事，第三日照常開工，仲要拍一場好開心的戲，連我都奇怪點做得到？但我要盡演員本分，不過收工仍然會諗起媽媽，會諗媽媽身後事仲有哪些做得未夠周到。
爸爸以我為榮
我認為孝順係應分，我「契家姐」陳曼娜曾經請我去她府上睇煙花，我堅持請埋我媽媽。媽媽生前，我仲會拖實她行街，媽媽過身後，我拖爸爸手，他不習慣，後來我每次拖他，他面上都流露一種proud of有我呢個仔的喜悅，現在我有時間就陪他飲茶，又會「唧」他，逗他玩，因為媽媽過身，爸爸都好傷心，但媽媽只是去了一個很遠的地方，有朝一日，我們三個都會在那邊重聚。
口述：林保怡 筆錄：影視組