陳法蓉：畀埋錢佢使都得

一直以來都被誤解我係無心工作，只想嫁入豪門，其實唔係女明星就一定想嫁入豪門。我自尊心好強，唔係咁鍾意攤大手板攞嘢，哈哈……佢送上門梗係冇所謂啦，買樣嘢都要問過，我就真係冇乜興趣喇。我可以養起自己同屋企有餘，我為自己嘅經濟能力而驕傲。

否認零收入

上一段關係我畀人形容係零收入，如果有上我公司網站睇下就知我不斷工作，只係唔似梁朝偉咁好多錢一部戲，但絕對唔係零收入。愛嘅話，就算冇錢我都可能會揀，愛到癲嘅畀埋錢佢使都得；唔愛嘅，有錢都唔一定得，之前有同個經濟唔及我好嘅人到談婚論嫁，最後係因為發現佢一腳踏兩船而分開。

拍拖次次傷

自09年同朱明分手後都冇拍拖，可能人哋以為我係因為愛情重傷，點解次次分手人哋都覺得我係受重傷嗰個？我只能夠話我從來都唔係太堅強，但亦唔係好脆弱，有啲事大家誤解咗！例如話我墮入感情陷阱，我再三講係冇，亦相信同我拍過拖嘅人係互相付出過，我每次拍拖都滿懷希望，覺得係開心至開始，每次真心對嗰個人，所以每次都傷，唔能夠話邊次比邊次更傷，只要真心愛過嗰個人，以為有將來但最後冇結果，嗰段時間都係難過，我亦相信對方愛過我嘅亦一樣難過。