司棋籲冷靜觀望 阿姐：係時候檢討
對於劉家豪、梅小青成高薪挖角對象，跟劉家豪合作《溏心風暴》系列的李司棋聞言說：「唔會走啩？家豪哥之前承諾我哋原班人馬繼續拍落去喎！」不過在電視圈經歷無數挖角潮的司棋姐，對於今次電視風雲有感而發：「有同事收到挖角短訊問我意見，我都話要睇公司嘅穩陣性、耐力同後盾，應該冷靜諗清楚係咪適合自己。」
至於効力無綫40年的汪明荃接受《東張西望》訪問時，對公司可謂「愛之深、責之切」：「都係時候嚟一次大調整，檢討吓點解咁多人有抱怨。公司要關心員工，畀一個舒適嘅環境佢哋工作，員工要有足夠休息時間。當然依家百物騰貴，要考慮吓薪酬調整問題。」她又謂自己先後經歷過鍾景輝、林百欣等挖角潮，但始終有感對無綫有歸屬感，且暫未看到有機構可取代之。