陳法蓉：冇做第三者！

我係一個單身快樂女人，因為我希望做到唔同階段都可以享受生活，例如單身就開心做單身女人，結咗婚或者有BB，好似啲朋友咁湊仔湊到七手八腳，都一樣享受，依家身邊多咗媽咪，好似經理人、Ada（蔡少芬），以前可能傾去邊食消夜自助餐，依家會講BB有冇屎屙，哈哈。話題唔同囉！見身邊人邁進其他階段，好戥佢哋開心。以前住Ada隔籬，佢婚後需要更好環境培養下一代，小朋友有花園玩幾好，佢哋有叫我搬去一齊住，但我作為一個單身女人，一間house三層都得我一個，除咗拖地拖多啲，睇唔到有咩好處。

許晉亨與李嘉欣的童話式婚禮令多少女生稱羨。

周慧敏與倪震戲劇性結婚一幕，相信很多港人也很難忘。

「追我嘅人要主動」

適應咗單身，覺得好方便亦好享受。如果拍拖，朋友食飯約星期六就要憂慮另一半；單身嘅話，突然想做就可以去做，係另一種快樂！我好享受一個人旅行、睇戲甚至食飯，自己話晒事，亦可以享受咩都唔使理；但同朋友一齊，我又好享受有人安排好晒，咩都唔使諗喎。不過，有時想搵人一齊睇戲，有伴嘅朋友都睇晒，都有一絲寂寞閃過o架！但問題係我唔會隨便同一個唔係咁鍾意嘅人只係陪我或者接送，唔係我looking for嘅關係，我唔易鍾意人、好被動，所以追我嘅人要比較主動，可能佢行十步我至有一個反應，要變成我男友唔容易！以前雖然有拍拖，但其實好多時候係一個人。

先後拍過拖嘅倪震、許晉亨，都同李嘉欣拍過拖，啲人會覺得我係咪同李嘉欣特別有緣呢？哈哈哈哈……佢早我一屆選香港小姐，係佢頒獎畀我；前後兩個男友……咁講啦，窈窕淑女，君子好逑，香港小姐冠軍喎，梗係人見人愛，個個都想要啦，哈哈哈哈……所以唔單只嗰兩位先生想要，人人都想要嘅，咁都係緣分嚟嘅！

親解「上世紀」之謎

某次我同李嘉欣曾經同場出席活動，當日之後就出咗一單佢被問到我同許晉亨拍拖嘅事，佢答話係「上世紀嘅嘢」嘅新聞，其實係一場誤會，正如當日我去到，有記者同我講Michele（李之洋名）嚟咗，我就問咗一句「邊個Michele？」因為我只知當晚有好多嘉賓，結果畀人寫話我唔識邊個係Michele李嘉欣，個記者都冇講個姓，我又一時諗唔起。

其實當時同佢同場冇尷尬，我哋係認識，佢喺我心目中係好大方嘅人，之後睇報道佢都話「上世紀嘅事」只係指好耐以前嘅事。我同佢同一場合出現都唔係第一次，有乜值得大驚小怪？我哋次次見面都會打招呼，呢啲係基本禮貌，入行咁多年，大家都明白，唔會因為咁而產生尷尬。

當年被指係倪震、周慧敏嘅第三者，我冇做第三者！（按：94年倪周分手，陳倪拍拖兩年後分手，倪周復合）我唔鍾意畀人屈！成件事好混亂，拍拖時話佢哋已分咗手，佢亦親口同我講獲前女友祝福。我鍾意係就係，唔係就唔係，唔鍾意拖泥帶水。其實好多謝倪震，當年佢已經澄清，所以最難受唔係被指第三者，係同自己相愛嘅人分開後互指不是，咁樣會變得好可惜。

拒接受複雜感情

好多前度男友依家已開花結果，搵到幸福、適當嘅另一半，只要愛過嘅，我都會祝福，無論當時係乜嘢理由分手，即使曾經心碎，睇番轉頭，呢個人以前對你咁好，就算唔可以喺埋一齊，佢陪過你成長，冇必要諗番佢唔值得回憶嘅事。我只望佢好同開心，何況我都係開心快樂單身女人。

第三者我絕對唔會做，但呢個世界有冇真相，或者你知嘅真相係咪真係真相呢？我有朋友試過對方話冇女友，原來結咗婚都唔知，我冇辦法保證呢件事唔會發生，唔做第三者係我嘅願望，因為我唔想要複雜嘅感情，只想感情生活簡單，甚至唔想對方有小朋友，愈簡單愈好，做第三者對我嚟講好困難，我個人好小器，亦好傳統，唔想同人share另一半。

Profile

英文名： Monica Chan

生日： 1967年10月28日

身高： 1.68米

入行經過： 1989年參加香港小姐奪冠，同年以香港代表身份奪得國際華裔小姐亞軍殊榮，其後拍攝多部電視劇集和電影。

作品： 電視劇作品包括《人在邊緣》、《刑事偵緝檔案Ⅲ》等；電影作品包括：《龍騰四海》、《槍王》、《高度戒備》和《猛男滾死隊》等。

口述：陳法蓉

筆錄：影視組

場地：AL MOLO

攝影：黃叔榮