慘受攻擊 走出陰霾 謝安琪Q神抗壓
外表柔弱的謝安琪（Kay），縱使被負面新聞連環攻擊到體無完膚，但在人前總是硬淨得可以，不動聲色遮掩內心那股無形壓力，全憑天生的阿Q精神，教她學懂看開放低，逐步走出沉重打擊的陰霾，努力去嘗試改善人際關係。
由細到大我的生活都好風平浪靜，到入行後先發現世界唔係咁簡單平靜，一路我都覺得當歌手，我應付得幾好，直至《鍾無艷》、《囍帖街》歌曲受歡迎，見報率多了，開始有人對你評頭品足，話你生完仔好肥，呢啲都打擊唔到我，外形呢啲我好接受到，直至去到一啲好炒作的負面新聞，就一直唔放過我，我開始覺得好攰，我個人算係幾正能量，但一次、兩次我OK，三次都冇事，去到第四次開始接受唔到，慢慢我覺得愈來愈大壓力，試過病試過要食藥，但依家我學識睇開啲，明白呢個世界總是徘徊在誤解、偏見當中，做藝人就係承受最多呢一種壓力。
外表硬淨脆弱易喊
好多人覺得我硬淨，我個款囉！好似乜都頂到，其實我係把聲硬淨，我係好易喊，我感動又容易喊過人，亦好易被Hurt，好脆弱，但我好易let go，遇到唔開心、好大打擊，我可能會喊，或者畀時間自己靜下來、搵人傾訴，我可以轉頭就冇事，好似負面新聞咁，依家問起我，我唔記得，我唔記得人哋攻擊我乜？點解攻擊我？我已經算數，過咗就算，我唔會刻意覺得有人針對我，起碼咁樣諗自己會舒服啲，我幾阿Q，覺得努力目前，總有一日有機會畀大家睇到真相。
不善應酬常遭誤解
在人際關係上我唔係一個善於應酬的人，我係好被動好慢熱，唔識得主動同人交朋友，但我唔會抗拒同人交朋友、傾偈，雖然我知咁嘅性格在娛樂圈蝕底到爆、唔着數，好多莫須有罪名，因為不夠主動被人覺得懶cool，答問題答得正路，冇乜搞花臣搞笑娛樂大家，又覺得你好道理王好悶，但我覺得每個人性格唔同，我冇理由為呢個行業改變自己性格。
咩款嘅打擊都齊晒，面對負面新聞真係睇得好開，我只想趁有呢啲新聞回應時講吓道理，我唔會放過呢啲機會，講我有咩所謂呀，你話到我個人品格有幾差都好，傷害緊一個人啫，但係好想講咁樣作古仔描黑一個人，其實係影響好多人，令到睇嘅人都累積到好多負能量，以為做音樂的人好差，以為香港樂壇冇乜好嘢，呢啲先係真正傷害樂壇，傷害到好多人的心靈唔平安，我好想講我做呢行係想本住好的心去做，有人對我誤解、誤會，有機會解釋我唔怕囉嗦講多兩句。
改善記者對立關係
我唔知自己EQ高唔高，但我唔係好易情緒失控的人，我唔係壓抑自己，我真係可以呼一口氣放得低就放，心境平和係我性格，入行前我從來無喺屋企有發過脾氣紀錄，我同我老公（張繼聰）拍拖連結婚，六年來我哋都冇鬧過交，一次都冇，我唔鍾意同人衝突，但入行後有啲情況我唔識應付，可能我的風格唔係好娛樂，未必次次都好有娛樂性，慢慢形成我嘅壓力，要見記者我都好緊張，但今年開始我同自己講，大家相識係一種緣分，我真係希望工作時開開心心，我想改善同前線記者關係，令到佢哋覺得採訪我都可以輕鬆，我哋做娛樂行業，如果我自己唔開心，寫出來的又唔開心，觀眾睇嘅又係好負面的報道。
扯上緋聞愧對Eason
Kay跟張繼聰由拍拖到結婚，一直被指「女尊男卑」，但絲毫沒有影響兩夫婦的感情，反而為跟陳奕迅（Eason）的緋聞而感到不安、內疚。
寫我同我老公反而我完全無嘢，所有嘢都好荒謬，搵錢從來唔係我哋兩公婆最緊張的事，就算寫到好誇張，都傷害唔到我哋兩個感情，反而寫得最多係我嘅緋聞，因為影響到另一個藝人，你攻擊我攞第二個人來做題材，係同一時間對兩個歌手造成傷害，我覺得好大壓力的地方，喺成件事影響牽連太多人，好明顯係想針對我啫，但唔好傷害我身邊其他無辜的人，如果你淨係寫我人格有問題、態度差，你影響我一個人，我都心安理得，因為我知自己又唔係咁嘅人，我總有一日努力可以證明到。
口述：謝安琪 筆錄：薇美 Hair：Eve Chiu@P.O.P HAIRDRESSING Makeup：Andy Leung@MAKE360.com. Stylist：DEE 服裝：The Collective、Voulez Vouz