嘉玲少見偉仔冇婚變
劉嘉玲與梁朝偉拍拖多年，經歷幾許風雨，08年終在不丹完婚，雖然嘉玲多番表示會努力造人，但造人大計未成，早前卻傳出他們婚變消息。嘉玲昨出席活動時否認婚變，但承認與偉仔少見面，自言老夫老妻，年紀唔細，唔會掛住對方。
昨日嘉玲穿着一襲性感連身裙出席內地「曼荼園」樓盤活動，裙身deep V設計兼大露背，前露後露，加上超貼裙身，實行以行動證明沒有身孕，她說早前的確吃多了，滿足自己的食欲，導致有少許發福，才誤傳她有喜。
她透露早前到上海陪媽咪搬屋，問到是否已購買該新樓盤時，嘉玲笑言買不起，但喜愛睇樓的她，直言擁有物業勝過偉仔，她說：「我同偉仔喺香港都有物業，但冇聯名物業，佢有佢，我有我，我多啲添，因為佢冇時間買樓，佢都冇興趣睇。（你哋財政獨立？）好獨立，（之前傳你哋婚變？）要問番寫嗰個人，可能咁寫為咗奪別人眼球，爆炸性啲，畀佢哋製造是非。（你哋係咪好恩愛，冇問題？）有乜問題？（會唔會耍花槍？）唔止夫妻，男女朋友都會，偉仔拍戲呢排冇見，大家唔好咁敏感。」
羨慕封后冇戲癮
正在拍攝電影《一代宗師》的偉仔，竣工無期，但嘉玲表示無意往探班，更表示唔會掛住偉仔，她說：「仲細咩，都老夫老妻，唔使啲咁嘅儀式。更加唔會同佢玩視像，呢啲係後生仔玩意，自己唔慣對住鏡頭。」對於葉德嫻奪威尼斯影后，她表示羨慕，但自言沒有戲癮，失去了拍戲的衝動。
文：名人組