陳奕迅坐輪椅飛滬 祖兒笑跛son
容祖兒（Joey）昨日到電台宣傳不忘關心好友陳奕迅（Eason）腳傷，笑指Eason變「跛son」靠手行路外，更大爆平日「也文也武」的Eason，在她面前笠水（鵪鶉）冇料到。
Joey昨日推出新碟並到電台宣傳，主動提及Eason昨午於微博上一張坐輪椅相，她笑說：「佢好似又整親腳，兩隻腳都整親，冇腳行架喇喎，用手行呀？」原來Eason前晚工作回家時意外扭傷，經跌打治療，預計三日就能復原，昨日他如期出發到上海出席代言活動，其助手於微博直擊Eason傷勢及活動情況，並表示：「坐輪椅上機是航空小姐細心照顧及安排。」照片所見，Eason到達上海亦自行步出機場未有任何攙扶，而他今日將現身南京繼續代言之旅。
「佢好驚我」
對於Eason日前被問到無綫疑因星力減弱縮皮撤回電視城舉行頒獎禮的言論，Joey哈哈大笑說：「佢講啲嘢唔回應，佢成日都亂噏，（唔畀面你喎？）佢好驚我，試過得罪我，畀我鬧，幾個月冇睬佢，喺我面前笠晒水，依家唔會喺電視台撞到面講嘢放肆咗，記者面前佢就威，不過佢係男人畀番個薄面佢啦。」
至於Eason「睇好」朱咪咪勇奪女歌星大獎，疑不將Joey放入眼內，她說：「當冇聽過，（睇小你喎？）唔回應佢，唔理佢。」
接君如棒搞笑
此外，提到新碟以波浪設計達至一個封面兩個Joey效果，Joey笑言似足洗衫板一物多用，她透露將於10月初開工拍為她度身訂造的電影，監製杜汶澤要求她出動全數私伙靚衫，包括歷年個唱戰衣，她說：「都幾頭痕，拍咗紀念可以畀仔女睇，但演戲唔係強項，都有擔心，（男主角？）有胡歌，（你自己揀？）冇得揀，如果係另一個男主角就唔係杜汶澤啦。」至於有傳Joey將接拍賀歲片，她說未落實，並笑言：「大家都覺得我搞笑，接（吳）君如棒。」
採訪：音樂組