陳茵媺冧望陳豪:好啱心水

台慶頒獎禮年尾才舉行,但視帝視后之爭已達白熱化階段,由於之前焦點一直放在黎耀祥、謝天華及黃宗澤身上,看似被「睇低一線」的陳豪遂以另類招數抗衡,與陳茵媺破天荒以情侶檔姿態擔任剪綵嘉賓;捨身為「男友」谷人氣的陳茵媺,更暗示陳豪「好啱心水」搶焦點,認真抵錫!

隨着本報踢爆陳豪與陳茵媺在深井設下「行宮」方便朝夕相對後,二人戀情可謂逐漸浮面,更數度盛傳結婚。愛情得意的陳豪,事業卻相對「失意」,皆因演技出色的他,竟未被列入視帝大熱,黎耀祥、謝天華、甚至後起之秀黃宗澤均紛紛「入閘」蓄勢待發。眼見被「睇低一線」,陳豪遂想出絕招借「女友」陳茵媺谷旺人氣。

孖住拍新劇

昨日,陳豪與陳茵媺首度以「情侶檔」到旺角為手錶品牌TITONI新店擔任剪綵嘉賓,以白色斜膊裙示人的陳茵媺,與穿上西裝的陳豪襯到絕,陳豪更全程「𥄫實」陳茵媺兼一臉冧爆;席間,陳豪為陳茵媺挑選了粉紅色腕錶並為她戴上,陳茵媺隨即望向陳豪說:「好啱心水。」語帶雙關暗示陳豪稱心滿意,可謂甜到漏。可惜二人拍照時卻變為拘謹,企到離行離列,面對記者要求翹手更臉露尷尬。

除了打扮襯絕,兩位主角受訪時也齊聲跟傳媒問好,問到如此合拍是否想公開戀情?陳豪即大耍太極謂:「慢慢嚟,拍劇咩,你哋乖乖哋啦。」問到陳豪如此低調是否想保護剛萌芽的戀情?他說:「今次第一次一齊見大家已經好開心,難得可以一齊賺錢。」此時,在旁陳茵媺即補充謂:「遲啲我哋又一齊拍劇,見多啲可以加深認識對方嘅性格。」今日,二人便會為新劇造型。

襯到似結婚

談到為陳茵媺戴上腕錶如戴婚戒般甜蜜,陳豪即冧笑回應說:「哈哈,開心嘅。」之後陳豪反問記者與陳茵媺衣着是否配襯,記者指襯到似結婚時,他即笑謂:「呢個唔回應,聽唔到。」由於情侶檔形象討好,二人承認將來還有合作機會,不過一切詳情交由經理人洽談。

文:影視組