李丞責讚劉倩婷三個好
現年25歲的前港姐冠軍劉倩婷傳撻着42歲失婚堪輿學家李丞責，日前本報拍得劉倩婷夜奔男方寓所，逗留5小時後離開，頭髮更濕淋淋兼換埋衫。劉倩婷強調二人是朋友，但沒有斷言發展的可能性。而李丞責則讚女方「三好」，戀情似有逐步浮面之勢。
日前本報拍得劉倩婷在紅館為《星光熠熠耀保良》綵排後，即夜奔李丞責大埔寓所，在李丞責屋企逗留五個鐘，最離奇是她離開時換了另一套衫兼秀髮還濕淋淋。
劉倩婷昨日在電話中回應強調與李丞責是朋友，而夜訪對方家一事，她說：「其實係一大班朋友去咗師傅屋企燒嘢食。嗰日綵排完成身大汗，藝人會有幾套衫跟身，嗰日只係借咗佢個地方嚟換衫，都冇沖過涼，又點會話頭髮濕咗呢。」她表示不會因緋聞而避忌朋友聚會，問到她可有發展機會？她說：「依家大家係朋友，我要多啲時間再了解下先。」
葉翠翠稱男才女貌
至於李丞責在電話回應劉倩婷夜訪住所時，不失本行作風對答滿「玄機」，但卻不禁大讚劉倩婷有「三好」好女仔、好朋友、好同事。問他是否與前妻已分居及離婚？他說：「自己唔係郭富城，但不幸有半隻腳踩咗入娛樂圈，如果將來有其他發展，再同大家分享。（劉倩婷有冇去你屋企？）你哋有冇影到佢入屋呀？我又唔係大地主，話佢去新界就等於去我屋企，成個新界我住晒咩！」
李丞責續說：「依家我好深閨，屋企又有游泳池，平日會請朋友嚟屋企游水、燒嘢食，游完水頭髮就梗係濕架啦。（劉倩婷都有游水？）唔回應，只係可以講屋企開親Party都唔會得我哋兩個囉。」
另外，與兩人曾合作過的葉翠翠昨日出席活動時被問到可覺得劉倩婷是第三者？她說：「唔知，但真係一齊會祝福佢哋，佢哋男才女貌。」
文：影視組