漢‧族
男服女穿的masculine時尚態度已見怪不怪，在時裝界亦不是新鮮事，這個風尚可以說是Coco Chanel帶起，當年打破世俗眼光，以男性化形象示人，風潮延續至今。近日，一眾女星都跟隨潮流而集體化身「男兒身」，可惜有些功架不足，以致神韻離體、不倫不類，星級形象指導郭慶彬（Ricky）就力讚Ball后薛芷倫最具型格，英姿颯爽中演繹出「真的漢子」，天后容祖兒亦穿出modern chic男人味。
薛芷倫
好有型，不愧為ball后，性感得嚟又可以散發cool味，加埋一頭短髮，成個look好精彩，靚到絕。
容祖兒
識以黑色top配襯military-like pants，好有型，再襯頂紳士帽，簡簡單單穿出modern chic。
杜如風
好肉酸，着到好似睡衣，雖然有名牌上身都唔掂，完全carry唔到，冇得執。
唐寧
紅黑配搭襯唔出型格潮魅，但尚算不過不失，完全係個道士頭破壞一身美感。
黃奕
向來甚少中性打扮，這身西裝cut的連身長裙亦剛亦柔，尚算ＯＫ，不過加番銀色cuff，成件事更加潮。
官恩娜
好核突，披頭散髮已扣分，睇埋件OL feel西裝褸兼內配立體剪裁背心，完全格格不入，如果改襯淨色背心加cropped pants兼梳個貼服髮型，total look更時尚。
鍾舒漫
打扮ＯＫ，着到身形比例好均勻，最搶眼係一頭紅髮，將全黑打扮點綴更精彩。
Janet Jackson
感覺好前衞，一身白色裝扮同佢黝黑膚色相映成趣，黑白分明，可惜敗於80年代曲髮，若然換上短髮造型則更有英姿。
點醒你
如果要着出男性味道，未必下下都要西裝套裝上陣，當然一件西裝褸是基本配件，而一頂紳士帽都可以令一身打扮更神似。此外，打bow呔是另一個化身男兒身的最好辦法，時尚更有趣，若然打呔未免太過刻板沉悶了！
Who am I？
星級形象指導郭慶彬（Ricky Kwok）至今為一眾女星裝身扮靚，包括李冰冰、張惠妹與徐若瑄等等。他有自我一套的審美標準，眼光獨到，曾到巴黎時裝周及高級女裝訂造服睇騷包括Chanel、Christian Dior、Valentino與及Jean Paul Gaultier等等。