張天愛貝安琪憶911猶有餘悸
明天是911恐襲十周年，不少名人明星憶起慘劇時仍然猶有餘悸。當年身在紐約的設計師張天愛及模特兒貝安琪，至今對慘劇仍歷歷在目。反而現時身在紐約欣賞時裝周的台灣型男羅志祥就表現輕鬆！
昨晚《Hong Kong Tatler》舉行周年餐舞會，出席嘉賓有周汶錡與男友、余安安、利蘊珍、龐維仁、李桂蘭及趙式慶等。其中張天愛談及911十周年，表示當年正身在紐約做時裝周，至今憶起慘劇時仍十分傷心，她說：「時裝周舉行地方就正正喺世貿隔籬，依家仲好記得爆炸嘅情景，真係有好大嘅陰影，諗起都會喊。我美國間屋隔籬有個女人，佢個仔一畢業就去咗世貿做嘢，之後就冇再返過嚟，個女人成日喺𨋢口喊，講起都心痛！」昨晚她跟父親張有興一同前來，去年曾中風的張父精神不錯，她說89歲的父親擁有頑強的生命意志，令她十分敬佩！她又謂自父親病後，才驚覺時日無多，深怕發生甚麼事已挽救不了，故此會盡量多抽時間陪伴爸爸。
宿醉逃過一劫
而911同樣身在紐約的貝安琪（Ankie），憶述十年前的一刻仍感到心寒，她說：「嗰時我喺紐約讀書，住嘅地方就喺世貿附近，本來計劃同個朋友911去世貿參觀，不過好彩之前嗰晚我哋飲咗酒，所以第日瞓晏咗，先避過一劫。」而Ankie母親劉香萍在發生恐襲後，不停致電女兒都找不着，一度十分擔心，事後她還着女兒到朋友的鄉村地方暫住，不過年少的Ankie就未有就範。此外，羅志祥（小豬）昨日在微博透露正身在紐約欣賞時裝周，還上載遊覽相片，似已忘懷911的傷痛。
文：名人組