基仔軟晒索模波餅慰勞

古巨基匯合樂壇經典快歌炮製新歌,更斥資七位數字打造科幻MV,原來他為了這個MV,通宵剪接,做完整個人軟晒。前晚基仔舉行MV首播會,性感女主角現身撐場,合照時更施以胸壓傍實基仔。

基仔重金打造新歌《勁歌金曲3-Party King》,前晚於銅鑼灣舉行MV首播會,除經理人霍汶希(Mani)到場支持外,MV中兩位索爆性感外籍模特兒Juliana S.與Madi R.亦有現身,合照時更挨實基仔大送波餅,認真艷福不淺。

被讚理想對象

席上Juliana S.被問到基仔是否其理想對象,她即靦覥表示基仔為「全球女性最佳理想對象」,氹得基仔笑逐顏開。

MV由基仔親自執導兼繪畫story board,通宵剪接誕生,他說:「真係新鮮熱辣o架,之前一直有工作,再返去剪接,30個鐘頭冇瞓過,做完成個軟晒,返唔到屋企沖涼,牙都冇刷。」

基仔再次重提望Mani擔任其MV女主角,問到他打算如何打動對方?他說:「繼續用勁多錢拍MV囉,用晒啲預算請唔到女主角,等Mani要親自上陣。」身旁的Mani聞言後即表示《勁》MV製作費已破紀錄完成,她說:「比平時多個零,另外仲有其他歌手嘅歌曲版權費,投資好大。」問到基仔如何回饋公司?他說:「我一直都幫公司𢱑銀,所以先可以咁使。」

唔會Hea住跳舞

至於個唱即將舉行,基仔表示屆時必定為歌迷帶來精彩舞步,他說:「堅跳!Hea跳就衰仔,都會加入經典動作,所以都要鍛煉下,(辣身舞?)安排下,辣辣哋啦。」

採訪:音樂組