王喜last day寸爆樂易玲
冰封三尺，非一日之寒！陳志雲昨日正式返無綫復工，亦是王喜在無綫最後一日工作，王喜在無綫多年與樂易玲積下不少恩怨，昨日他便「臨別秋波」，「兵分兩路」在外景及透過微博寸爆樂易玲「假惺惺」。
王喜一直對無綫業務總經理陳志雲不離不棄，被指與製作資源部總監樂易玲「對着幹」，因而招致不獲無綫續約的惡果。王喜昨日為無綫最後一日工作，與港姐張秀文到蘇屋邨為節目《香港演義》拍外景。
不要再逼她撒謊
將沒有合約在身的王喜，未埋位時到茶餐廳吃早餐，與工作人員和街坊有傾有講，問到最後一日為無綫開工的心情如何時，他說：「輕輕鬆鬆囉。（輕鬆晒？）都係架。（無綫有冇新工作搵你？）暫時都冇呀。」有指陳志雲脫罪後，樂易玲立即轉口風指「有適合工作」會找他演出，王喜聽後哈哈大笑，並句句有骨寸爆說：「好呀！我等緊佢電話。仲有呀，大家唔好叫人樂小姐，應該係陳太，人哋生咗兩個啦，咪叫到人哋好似未嫁咁。」
陳志雲無罪釋放，問王喜會否與他食飯慶祝？王喜說：「等電話囉，冇話刻意嘅。」他透露完成無綫的工作後會到北京拍劇，期間會有空回港。問到陳志雲脫罪是否可以令他安心工作？他說：「唔好講到我好似安心上路咁，都係咁啦，成日都要上上落落。」
另邊廂王喜又利用微博繼續寸爆樂易玲，叫大家不要再逼樂易玲撒謊。他寫道：「大家都知自己是陳生（志雲）的朋友，日後如果自己在無綫有好發展的話，陳志雲便會被罵偏私、公器私用；若發展不好，陳志雲又會被罵忘恩負義。」
王喜直指老練的樂易玲「有適合工作便找他」言論是相當精準，王喜說：「我離約滿都唔夠一個月，仲等到咩？」
「唔係我一個決定」
對於王喜言論，樂易玲表示不欲回應，以免形同罵戰，但為了實質的情況，她澄清說：「無綫有本身嘅制度，每個藝人嘅合約、續約與否，唔係我一個人決定；每個藝人嘅合約情況，由加人工、出幾多騷，都要由製作部總監級開會商討，唔係一個人或陳生可以決定一切。」
樂易玲又直指王喜「諗多咗」：她續說：「藝員部係會將藝人情況講出嚟，如果有藝人工作量唔多，會建議用多啲，如果有人接唔停工作，會爭取畀佢休息，呢方面我冇需要講大話，我覺得王喜佢諗多咗。」她坦言亦曾就王喜的個案拿出來討論：「最終得出結果係將來有啱嘅工作再搵佢。」
對於被王喜稱呼「陳太」，樂易玲說：「冇所謂，一個稱呼啫。好多人都咁叫我。」
文：影視組