陳總強勢回歸 樂派借歪

隨着志雲強勢回歸無綫後，嘗盡人情冷暖的他被指誓展開武士復仇，盛傳多時的陳志雲與樂易玲之間的派系鬥爭亦將戰火重燃。曾在庭上指有人「賣藝人豬仔」的樂易玲，昨日否認請辭以避志雲。她說：「有乜可能？唔會囉，咁辛苦至等到呢個完美結局，依家乜事都冇，士氣重振，點會唔做？希望唔好再有唔開心事出現。（有冇同志雲聯絡？）我發咗短訊畀佢，知佢星期一返工就冇再煩佢，留番返工至傾。（雲派王喜早前被叮？）無綫對王喜從來冇變過，無綫唔夠人用，係佢要拍內地劇時間夾唔到。只要劇啱，佢又想返，無綫隨時歡迎。」

胡杏兒：從冇分黨派

被指是樂易玲愛將的林峯，對於樂派失勢，隨時年尾頒獎禮有獎變冇獎。他說：「成日都咁傳，獎項對我唔係最重要，最緊要得觀眾認同。」憑《怒火街頭》一洗「冏」譽、將以《萬凰之王》出戰頒獎禮的胡杏兒表示：「從來冇分黨分派，我唔擔心獎項，最緊要做好自己。」

被指有望以雲派藝人身份而三連霸贏視帝的黎耀祥說：「我要澄清，其實係《巾幗梟雄》嗰期令我演出多咗，同陳生喺工作上溝通多咗，但講唔上熟，話我係雲派係抬舉咗我。況且《法證先鋒3》都未播，我對攞視帝信心五五波，視帝牽涉好多因素，要睇投票，講民意。當然我梗係想連續三年封帝，締造歷史。但我睇好林峯、鄭嘉穎。（都係失勢嘅樂派藝人喎！）又唔使分得咁清楚嘅。」

鍾嘉欣	法拉被指是視后大熱，但她謙稱一切言之尚早。（資料圖片）	被指是雲派的楊怡有望在台慶爭大獎。

馬浚偉感激實現願望

被列雲派的陳法拉強調自己沒有分派，問到會否覺得奪視后機會因而大增？她說：「離台慶都仲有幾個月，台慶劇都未出，言之尚早。攞獎唔係睇高層，係睇角色同收視。」

馬浚偉坦言與樂小姐在工作上的磨合程度不高，他說：「我承認前年七月同樂小姐傾續約，磨合得唔好，真空咗成個月。後來得陳生同曾勵珍幫手，陳生仲承諾會開《大廚出馬》，陳生的確實現咗我好多願望。（有信心攞獎？）我唔知我係唔係雲派，但我對獎項好隨緣，我嘅恩師係珍姐。」

文：影視組