唐寧孭「節瓜巨B」巡街市氹掂菜檔師奶
唐寧於今年三月榮升媽咪，日前孭着「節瓜巨B」出巡買餸，打扮隨意的唐寧，挑選蔬果時精打細算，十足師奶仔。全程與唐寧一樣展現甜美笑容的「節瓜巨B」，獲菜檔師奶大讚可愛兼似足唐寧，氹得新媽咪不住甜笑。
產後成功減掉數十磅的唐寧，日前孭着肉地十足的節瓜手腳巨B現身粉嶺街市；身形略見圓潤，一身闊tee、短褲、人字拖的唐寧，全程在菜檔主攻紅蘿蔔、番茄及節瓜，左挑右選之餘，更細心地逐一將瓜菜放在手中秤重量，精打細算程度恍如師奶仔。
手忙腳亂
由於孭着BB又要揀菜，只當了三個月母親的唐寧偶爾顯得雞手鴨腳，付款時更一度掏不出錢包；菜檔師奶趁唐寧忙亂期間，逗節瓜巨B玩，只見巨B不但高興得咿咿呀呀，更向菜檔師奶展示與唐寧如出一轍的甜笑，逗得菜檔師奶十分開心，大讚巨B似足唐寧及可愛。離開菜檔後，唐寧轉戰附近寵物店購買龜糧，不足一分鐘即極速離開，「快閃」歸家。
怕熱快閃
事後唐寧接受電話訪問時，笑言為免BB怕生，閒時只要有空便會帶他四處閒逛，她更說如此快閃另有內情：「BB好怕熱，平時食奶都會成身汗，呢排天氣咁熱，我唔敢同佢喺街逗留太耐，驚熱親佢。」
至於所買蔬菜，她表示是家中狗仔糧食：「我會親手整紅蘿蔔畀佢哋食，我唔想佢哋覺得我生咗BB之後忽視佢哋。」
文：影視組