李添勝爆山聰拍造型照蒲頭
陳山聰回港後，接拍無綫監製李添勝的新劇，之前，一直有指山聰會返公司跟添哥傾談角色及故事大綱，記者昨日致電李添勝，他坦言山聰不會回公司，添哥說：「佢打畀我話唔會返嚟傾，咁我咪喺電話同佢傾人物性格囉！（佢好忙咩？）佢怕咗你哋（傳媒）啦！一日幾十架車跟住佢，總之佢話直至造型嗰日先會返嚟！（電話傾會否唔方便？）冇所謂，（咁佢啲戲份有冇變，有冇加戲？）冇，一切照舊，同之前定嘅戲份一樣。」
杏兒唔怕搶風頭
至於胡杏兒，曾與山聰合作過，她說：「之前同山聰喺《萬凰之凰》有好多對手戲，都戥佢開心！不過公司好少小生，希望佢愛情事業都兼顧到！（擔心第日宣傳嗰陣被搶風頭？）仲好啦，有佢幫手宣傳！」
