超雲誓法律追究 護山聰保家聲

昨晚何超雲於七時半乘車離開位於布力徑的大宅，前往參加時裝派對。心情大好的超雲穿上牛仔短褲，配以寫上「優勝者」字樣的背心，甫到場即被半百記者圍住追訪，全程由丁子高陪伴左右。以下是記者與超雲的訪問。

記：記者 雲：超雲

現場有記者大聲呼喚：陳太。

雲：尊重啲唔該！

記：公開咗心情點？

雲：幾開心，不過我有樣嘢想講，今（昨）日有本周刊出咗啲不實嘅報道，我已經叫咗律師出律師信聲討佢哋誹謗。

記：邊本周刊？

雲：《壹週刊》。

記：可唔可以具體啲講邊方面誹謗？

雲：成篇都失實。

記：例如？

雲：唔想講。

記：你有冇畀錢佢畀贍養費前妻？

雲：當然冇啦，呢啲律師會做。

記：陽明山莊係你租畀佢？

雲：係佢租。

記：你有冇畀錢陳山聰？

雲：我同佢完全冇錢銀瓜葛。

記：佢係咪你結婚對象？

雲：唔好再講，咁樣會影響何家成個家族嘅聲譽。

記：去旅行你畀錢？

雲：唔係。

記：分開畀錢？

雲：唔想再講，你哋祝福又好，唔祝福又好都唔緊要，但唔好亂寫。

介意話女尊男卑

記：介唔介意畀人講女尊男卑？

雲：當然介意，我明白香港有唔同嘅傳媒雜誌，大家手法都唔同，但如果寫得太離譜真係接受唔到。

記：陳山聰有冇唔開心？

雲：佢習慣咗，不過都覺得係時候畀啲Warning。

記：陳山聰知唔知你發咗律師信？

雲：佢都知。

記：你哋會唔會結婚？

雲：講咗唔係結婚啦。

記：有人有啲唔好嘅評語畀佢？

雲：一早已經知，有啲人有受教育，有啲人冇，都幫唔到佢。

記：你好大壓力？

雲：少少啦，但唔係太大，都OK。

記：屋企人係咪反對？

雲：我講最後一次，我媽咪冇反對，佢一早已經知，我Daddy喺我哋去旅行前已經知，我同Daddy係好朋友，唔會唔同佢講。

記：爸爸鍾唔鍾意山聰？

雲：我見佢幾OK，有同佢講笑。

記：爸爸有冇安慰同支持你？

雲：佢叫我唔好理啲記者。

記：佢有冇教你點同山聰相處？

雲：冇，佢好放心。

記：媽咪好大壓力？

雲：唔係好大，反而細佬妹有話我喺度啲記者就跟住晒。

記：陳山聰好大壓力？

雲：呢啲壓力已經完成。

公開唔代表結婚

記：點解忽然公開？

雲：決定公開係因為唔想人亂寫，想畀真實故事觀眾知。

記：佢為咗你唔開工？

雲：係佢屋企人有事，講咗佢嚟咗十日就走。

記：知唔知山聰同佢前妻關係？

雲：我知道晒成件事，但唔太想講。

記：佢哋係咪分開咗你哋先一齊？

雲：係。

記：你視佢為結婚對象？

雲：唔好再講，我太細個唔想諗，我哋都係啱啱開始拍拖四個月，依家諗結婚好荒謬。

記：咁又話好穩定所以公開？

雲：穩定公開唔代表要結婚。

記：陳山聰有冇畀錢佢前妻？

雲：唔知，我哋好少傾呢啲問題。

而超雲逗留至晚上九時半離開，直返三太布力徑大宅。

文：名人組