糖妹美腿施誘 男粉絲隔欄示愛
「宅男女神」黃山怡（糖妹）出席活動時，有男fans向她高調示愛，一度欲進場接近伊人，令工作人員大為緊張，惟糖妹卻氣定神閒，更毫不忌諱地在狂迷面前施展美腿誘惑，果真人細膽大。
人氣組合糖兄妹昨日出席護膚品舉辦的環保活動，鐵欄外突然有一男fans離遠向坐在欄內的糖妹示愛，多次高喊：「山怡，我真心鍾意你呀……。」叫聲嚇窒旁人，糖妹雖然見到又聽到，但未有任何表示，令狂迷一度欲進場接近「女神」，工作人員即時十級戒備，加設鐵欄阻止及以「人盯人」𥄫實狂迷，以防有過激行為。毫無懼色的糖妹仍施施然上台唱歌，進行完拍賣及儀式後又再落台，還坐在狂迷面前露出長腿及面向傳媒鏡頭甜笑。
翹手護胸
糖兄妹接受訪問時，該男fans再大叫：「糖妹，我愛你呀……。」問糖妹可聽到？她說：「好多fans都鍾意糖兄妹，佢唔係我公司WOW Club嘅fans，但每次佢都支持，好多謝佢。（唔驚？）之前都見過佢，但佢唔好影響其他支持我嘅朋友。」遇上狂迷如何保護自己？糖妹說會多着件衫，人多地方就翹手及用背囊放在胸前。
單拖夜跑
糖妹家住人流複雜的深水埗可感危險？她說：「陌生人全是街坊，完全唔驚。」她更自爆愛在晚上獨自落樓跑步，身上只帶電話沒有防狼器。何不找猛男陪伴？糖妹說：「我有叫細佬陪我，氹咗佢半個鐘，但佢都唔理我，顧住玩電腦。」
文：音樂組