周子揚：係佢主動認識我

子揚入行至今一直專注工作，甚少傳緋聞。惟早前他被指與青春女歌手李蘊撻着，至最近李蘊跟台灣魔術師劉謙相戀，有傳女方撻着劉謙後，即撇甩「奀星」子揚。

日前子揚受訪時坦言對報道感到莫名其妙，他說：「我覺得非常無奈，同李蘊完全冇拍過拖！大家做新人嗰陣，佢主動認識我，但佢唔係我鍾意類型。」

周子揚對被捲入三角關係大感無奈。

李蘊青春可人，但周子揚強調絕不是他杯茶。

否認奀星

除了捲入三角關係外，子揚還被指是奀星，令他滿不是味兒！他表示最近工作不斷，除接拍三部電影外，又拍攝電台劇集及忙於錄音，早前他更自掏腰包請家人到羅馬、巴黎旅行。

子揚表示：「報道所講嘅根本唔係事實，其實除咗音樂以外，我仲幫家人打理房地產生意。」問到再遇李蘊時會否感尷尬？他說：「絕對唔會，總之清者自清，我冇做過任何攻擊人嘅嘢。（同佢聯絡？）好耐都冇聯絡。」問到現時感情狀況，子揚謂：「冇拍拖呀，暫時專注工作。」

文：專案組