黎明：早已準備做好地球人
「天王嫂」樂基兒（Gaile）自爆準備明年做媽咪，老公黎明昨日在活動上被問到是否準備做爸爸時，他不置可否遊花園說：「由我出世開始，就已經準備做好一個地球人。」
黎明、黃曉明、楊千嬅及著名鋼琴家郎朗等昨日出席UNICEF慈善音樂會綵排，黎明由於扁桃腺發炎全程細聲講說話，跟傳不和的千嬅全程零交流。黎明表示入行以來首次失聲，為擔心影響晚上的演出而服食抗生素，他說：「好在首歌個key唔高，又有小朋友傍住我唱，不過就算唱唔到，我都會讀台詞，咁樣先至有誠意。」
提到太太準備明年懷孕，黎明說：「私人事我一向唔鍾意講，大家睇時間同緣分啦，如果我主動講反而嚇親大家。（準備做爸爸未？）我個人由出世開始，就已經準備做好一個地球人。（有喜訊會公布？）唔會，我公布就嚇死你啦！有就會喺度，唔會呃到人，鬼叫做藝人咩！最緊要做好手頭上工作，講係冇用，let's do it！」
至於未見與黎明交流的千嬅，她解釋只是一直忙綵排未有機會碰面，問到會否交流生仔經？她笑言：「唔啦，仲敢問人咩？阿Joe（黎明經理人陳善之）仲問使唔使幫手介紹診所。（介紹黎明個醫生畀你？）唔會啩？我諗會分開介紹。」她又自爆昨早跑步中暑，踎在何鴻燊的大宅門口動彈不得，被老公嘲笑。
黃曉明為Baby滴汗
同場的黃曉明被問到有否跟女友Angelababy共度七夕情人節？他說：「七夕跟媽媽過，還有工作。（唔同Baby過？）拜託，我汗都出來了！（Baby拍電影，你有教她？）如果她有需要問我的話，我會回答她。」當提到Baby的問題時，曉明笑而不答，不停標汗，他說：「我是不會拐彎的人，又不好意思躲避你們的問題，我是為慈善而來，希望不會分散焦點！」
採訪：音樂組