陳庭欣卸任狂晒咪

昨晚《2011香港小姐競選決賽》在將軍澳電視城舉行，除了十四位佳麗爭妍鬥麗外，多位嘉賓亦以盛裝出席。當中即將卸任的陳庭欣、張秀文及莊思明加冕前盡地一露，大晒性感事業線，不讓一眾師妹專美！

放大圖片	四位去屆港姐與樂易玲（後排中）迎接六叔進場。	鄭兆良（左起）、謝婷婷、趙式芝及丁子高盛裝擔任評判。

莊思明前後放送

去屆冠軍陳庭欣身穿黑色斜膊長裙晒身材，平日密密實實的張秀文則以米色tube dress谷巨咪，至於莊思明更前後大放送，騷胸又露背，十分搶鏡！開騷時陳庭欣及張秀文傍實六叔邵逸夫就座，不停撩對方傾偈，非常識做。

張秀文谷巨咪上陣，可謂盡地一煲。

陳豪與周慧敏與眾佳麗多次接觸，誰勝誰負早心中有數。

大會評判陳豪身穿白色西裝進場，因他正力追06年港姐冠軍陳茵媺，其戀情狂被記者擺上枱，問到心水選擇？陳豪即扮公正表示「唔講得」，他說：「好多佳麗都好叻，修為同才藝都唔錯。」其後被指最識揀冠軍，陳豪即激動走音：「唔係！不過今年好多海外佳麗。（會唔會加分？）唔輪到我去加分，最緊要都係睇主流。」

謝婷婷斜膊晒貴氣

問到揀港姐是否以短髮及好身材做準則？陳豪說：「我好公平，要睇整體表現，總之好開心做評判，同大家share陳豪嘅港姐標準。」而在港姐舉行期間，陳豪再被司儀之一的曾志偉拿來開玩笑，笑他最近經常近距離研究港姐，令陳豪有點尷尬。

擔任「最上鏡小姐」評判的謝婷婷身穿黑色斜膊裝晒貴氣，大會評判周慧敏則以淡綠色晚裝配首飾，清麗大方。此外四太梁安琪亦帶同兩位兒子何猷亨及何猷君睇騷。

另外，評判之一的名媛趙式芝席間曾暗示佳麗「僭建」，她解釋：「呢啲好普遍！露台外牆都好常見！啲佳麗都好自然！（暗示邊個？）觀眾眼光好銳利嘅！有都好自然。（指得獎嗰四個？）你要問番佢哋！」

採訪：影視組