任達華籲嚴懲：醉駕罰層樓

任達華、趙碩之、戴夢夢、舊八模之一Annie G.及Hailey C.等昨日出席汽車活動，華哥表示之前太太琦琦送了一架名車給他，今次他有意再購車，由家中司機負責駕駛，他大讚司機很好，從不醉駕。其後，任達華提到因醉駕而被罰停牌半年的洪天明女友周家蔚，他好意勸告：「佢飲咗酒就唔應該揸車，佢可以打畀我，我叫司機去接佢。唔好話藝人，所有人飲咗酒都唔應該揸車，周街都係的士，點解唔搭的士，好方便。」

任達華勸洪天明及其女友周家蔚飲咗酒就唔好揸車。	（資料圖片）	Annie G.（右）及Hailey C.，與戴夢夢出席汽車活動。

強調非針對任何人

任達華強調並非針對任何人，但認為停牌幾個月至半年的刑罰過輕，提議要重罰才能起到阻嚇作用：「應該要罰停牌兩年，同罰十萬。」向來主意多多的華哥又戲言：「一係就罰層樓做公益，咁就個個都唔敢醉駕，因為依家嘅樓巿咁高，個個都想保住個頂。如果真係咁，我諗天明都唔敢畀女友飲咗酒揸車，冇咗層樓，唔通叫大哥（洪天明父親洪金寶）畀層樓佢住咩！」華哥表示以前有朋友飲醉酒，他都會開車送他們返家，但慘被對方在車上嘔得一團糟，所以現在他每次都會先走。

碩之想老闆送名車

至於趙碩之早前獲公司老闆林建名承諾會送車獎勵她，趙碩之表示為表誠意，自己首要考車牌，問到會揀甚麼價錢的車？她坦言：「我唔知，冇理由咁快問老闆。我自己鍾意瑪莎拉蒂，如果冇都可以退而求其次。」她稱揀車好比揀男友，她喜歡實力多於外形，問到邊方面實力時？她解釋：「要返到屋企煮好飯等我食，太靚仔冇安全感。」

文：名人組