白淨裸滿分
要數今夏熱爆顏色，相信非裸色（Nude Colour）莫屬！各大時裝設計師紛紛力捧，女星Model亦爭相演繹。不過，亞洲人膚色偏黃，裸色很易顯得面青青，一定要夠白淨才好看，又或是一身Tan Colour同樣Carry得到。名模陳嘉容就大讚楊采妮穿出高貴氣質，叫人看得賞心悅目，而湯唯則懂得選擇自己Style的服裝。
湯唯配合個性
「大方得體，唔係特別Sharp，感覺平實，好襯佢本身嘅Style。佢皮膚夠晒白，着呢隻顏色好好睇。」
楊采妮賞心悅目
「高貴得體，條裙本身好高雅，佢夠白着得好靚，佢一頭清爽嘅短髮，令成個Look更有味道同突出，對鞋同條裙成個Tone係一致嘅，令人感覺舒服。」
Jessica C. Less is More
「好有夏日氣息，佢嘅健康膚色着Nude色一樣好睇，好似佢咁襯少少Accessories，例如頸鏈同外套仔，Mix & Match會更有層次感，睇落無咁悶。」
林欣彤平凡少女
「時下少女嘅着法，條裙OK，不過對鞋唔係好襯，怪怪哋，如果換對編織底嘅Platform鞋，會型啲同Fashionable啲。」
周秀娜亂襯一通
「平時佢着衫間中都有驚喜，今次條裙同頸鏈、高踭鞋甚至髮型都唔襯，Total Lose！應該唔要條鏈，換對白色或淺色系嘅鞋，啲頭髮唔好梳起晒，換個感覺乾淨啲嘅髮型，會Trendy啲。」
呂慧儀束髮老氣
「幾高貴，佢都夠白淨，不過束起晒啲頭髮就成熟得滯，放番啲頭髮落嚟會更加好睇，會平衡番啲，唔會望落成個人都係肉色。」
何佩瑜豐滿得滯
「條裙本身好靚，但佢身材太豐滿，有啲衫真係唔適合胸太大嘅人着，胸細反而會型啲同Fashionable啲。同埋白色鞋都唔襯，換對肉色或者黑色高踭鞋會靚啲。」
陳慧琳乾淨利落
「穩陣大方，佢夠白淨，條裙同對鞋好Match，簡單唔花巧，感覺乾乾淨淨，有少女味之餘又有少少高貴。」
陳嘉容Profile
陳嘉容，香港著名模特兒，曾為各大國際品牌行時裝騷。在時裝界打滾多年，在時裝方面的認識，不論是理論還是實戰都難不倒她。近年更為電視時裝節目擔任主持，化身Stylist教人配襯衣着打扮。