樂瞳自認野蠻天生醋狂

事業：兩升兩跌

樂瞳憑劇集《點解阿Sir係阿Sir》中一招制服誘惑火速上位，不少人以為她是新人，其實她已在圈中打滾數年，經歷過兩次「小高峰」，但都後勁不繼，令她更珍惜這次機會。

樂瞳在劇集《點解阿Sir係阿Sir》中飾演學生妹，令她第三度彈起，她直言意想不到。	樂瞳轉戰樂壇後在「娘家」無綫奪得新人獎，令她百感交集。	07年，樂瞳入行後即參演《少年四大名捕》，戲份不少，更與吳卓羲有感情線，當時仍以原名龔茜彤發展。

「07年完咗訓練班就即刻拍《少年四大名捕》，仲同吳卓羲有感情線，當時好有盼望，但之後冇人搵我，我有檢討，真係演得唔好，而且我內向唔同人講嘢，見到監製又冇打招呼！跟住做番臨時演員，得一句對白！好灰！《巾幗梟雄》我有份做o架！但係做圍觀嘅人，齋企足成晚。」

甜笑	扁嘴	cutie

攞獎打回原形

「正當我想放棄，又出現第二次轉捩點，偶然機會下去睇農夫嘅騷，喺後台見到Tommy（當時農夫唱片監製），佢有聽過我把聲，之後仲約我簽約，其他有得出碟嘅藝員都係一線，好似鍾嘉欣、胡杏兒，我覺得好幸運！」

鼓腮	樂瞳獲爸爸全力支持在娛樂圈發展，而她則希望可賺錢為胞弟（右）鋪好路。	樂瞳性格開朗，雖然屢次跌倒，但仍不屈不撓闖星途。

「攞完新人獎以為爭番啖氣，遇着唱片公司人事變動，我又『冇得撈』，做番『路人甲』『記者仔』，好好彩拍《點解阿Sir係阿Sir》有咁大回響，估唔到兜兜轉轉都係劇集令更多人識我，嚟緊我有得唱番歌，我會好珍惜。」

愛情：七年之癢

樂瞳與上任男友拍拖七年，算得上是專一的女生，可惜最後因思想愈走愈遠，她毅然決定分手，回味過去種種甜蜜，她表示對方是其一生中最愛。

「我拍過4、5次拖，初戀喺16歲，至於拍得最長嘅就係上個男友，讀書嗰陣已經一齊，當年佢係轉校生，好高又大隻，成184cm，佢鍾意女仔細細粒，好夾！佢好錫我，見我手上有嘢就會搶住拎，仲會幫我綁鞋帶！諗番轉頭，我都係一個野蠻女友，好需要安全感，成日要清楚佢行蹤，而佢屋企開精品店，經常有好多女仔同佢傾偈，我真係會嬲o架！唔畀佢同其他女仔講嘢，諗番都覺得唔夠成熟。不過我冇要求佢送禮物畀我，食飯都係AA制o架！」

最怕吊兒郎當

「拍咗七年拖，到前年都係分手，因為大家目標唔同咗，距離愈來愈遠，我有鼓勵過佢讀書，但結果都係唔合格。睇電影《分手說愛你》嗰陣，角色遭遇同我好似，我睇到狂喊，其實我希望拍拖就係結婚，唔介意公一份婆一份，只係唔想老公吊兒郎當。」

「到依家我哋仲係朋友，有聯絡，但係冇可能復合，佢已經有女朋友，我都戥佢開心，我可以講呢個男仔係我暫時最愛嘅一個人。」

偶像：模仿城城

宅男女神樂瞳的偶像是日本天后濱崎步，但家教甚嚴的她並非追星族，最多只是買碟及追看偶像節目，童年時就試過對着電視跟郭富城跳舞。

「我嘅偶像係濱崎步，佢出親隻隻碟我都有買，最希望有一日飛去日本睇佢嘅演唱會，之前步姐嚟香港開騷我都有睇，仲坐好前！我嗰晚好激動呀！最欣賞佢形象百變，之後發現佢識填詞，就更加鍾意佢！我都好想有日有自己嘅作品，我諗我多數作曲！」

跟住楊丞琳走

「至於男藝人，我記得我六歲嗰陣勁鍾意郭富城，真係好靚仔，我有買佢嘅肖像Tee同睇佢Concert，仲會對住電視同佢一齊跳《對你愛不完》，諗起都好搞笑！」

「如果問我想走邊個藝人條路，我會揀楊丞琳，我同佢一樣都有Baby Face，但佢唔只可愛，仲做到好多角色，戲路好闊，舊年拎埋視后添！其實我唔介意做人阿妹阿女呢啲角色，都係一條路！」

後記：多謝樂小姐

不少三色台藝員開口埋口都多謝無綫高層樂小姐（樂易玲），原來樂瞳亦受過對方恩惠：「當時有唱片公司想簽我，佢有權唔畀，但佢好鼓勵我，畀機會我唱歌！」另外要多謝的當然是父母，無論樂瞳決定入行或經歷低潮，父母都全力支持：「屋企人成日播我啲歌，會畀中肯意見！」

口述：樂瞳

筆錄：立影

服裝：WHITE CHOCOLATE X Hello Kitty（double 'O'） 髮型：Renton via ILCOLPO

化妝：Vinci Tsang

場地：城寨風味