(13)蔡慧欣瞞父母咀仔 喪喊贖罪
港姐決賽明晚舉行，兩大「咪神」(10)李天縱及(13)蔡慧欣同樣是非纏身，前者被爆整容及陪酒，雖然努力解畫仍難息滿天謠言；後者則因咀仔相流出而壓力爆煲喪喊，更自爆講大話呃父母，似乎摘冠勢危！
全城矚目的《2011香港小姐競選》明晚舉行，十四位候選佳麗前晚在尖沙咀出席《港姐決戰前夕之傳聞對話》，為早前的種種是非大平反，並攜同親友作「人格證人」，力保「清白之身」登后座。席間，(9)麥美恩、(11)劉思希及「騰雞咪神」(13)蔡慧欣（Gemma）談及親人時「淚鬥淚」，令平反大會「水浸」！
媽咪保守棒打鴛鴦
經常緊張捽手眨眼的Gemma，甫上台已變喊包，談到夜蒲攬仔激咀相流出，她只「Oh」了一聲，淚水已奪眶而出，並說：「我從來冇同父母講過拍拖，驚佢哋鬧！我要同佢哋Say Sorry！我有心呃佢哋，但冇心傷害。」與此同時，蔡母亦感動得頻頻拭淚，並自認保守：「嗰個男仔係混血兒，我哋希望佢識番中國人。」Gemma受訪時再次為講大話致歉，並承諾下次拍拖定必「單聲」：「父母一句都冇鬧，可能驚我壓力大！（易喊？）係呀，比賽期間唔會，但贏咗獎就講唔埋！」
另一「咪神」(10)李天縱（Lena）則飽受負面傳聞攻擊，有讀者爆料指她眼、鼻、臉均曾整容，並附上她當年選美照片，「公開」其闊下巴及豬膽鼻，更指她曾在內地夜場陪酒陪客。除了「女大十八變」外，爆料者稱Lena明明於04年《環球小姐分區賽》落選，卻對外宣稱自己是「環球十佳選手」，有講大話之嫌！
家教甚嚴絕冇陪酒
攜同「餅印」媽咪現身的Lena坦言，對種種傳聞感驚訝：「我喺北京賽區攞過『優秀選手獎』，可能係之前啲報道錯咗。我亦冇整容，係瘦咗先變靚！（話你04年重105磅，但依家125磅，咁點瘦咗先靚？）嗰時我自己磅重，大會冇統一，況且當年得16歲，一定肥過依家！」她又澄清家教甚嚴，絕冇陪酒陪客：「媽咪要求我十點前要返屋企！」並強調沒因得罪人而遭中傷。
文：影視組