榮雪梅公開冧老公晚晚相依

久未露面的榮雪梅前晚出席護膚品活動，同場更有朱潔儀、王馨平、名模馬詩慧、楊崢、周倩圯、Jocelyn及老公Anthony等。榮雪梅表示兩年來常往返內地打理家族生意，以及到歐洲看顧兒子，故較少在港，更言雖然一直少上網，但早前開了微博，並因此而巧遇失散了廿幾年的童年朋友，兩人更約定於四川相見。

榮雪梅冧老公，表示願晚晚有他相伴！	榮雪梅上載出海照。	朱潔儀笑言冇愛情滋潤，惟有以花膠護膚。

四川會友兼做慈善

榮雪梅笑言現在有少少微博癮，「佢令我知道中國人真正諗緊或關心啲咩。（有冇被河蟹？）未試過，如果唔公平嘅嘢都會寫吓，但我只係small potato，就算寫咗都冇人留意啦！不過只係一味鬧政府係冇用，都要提出好建議。」她續說往四川一行會舊友外，更會做一些賑災，「我做過調查，我會親手畀錢啲有需要嘅家庭，對象係讀得書但冇經濟能力嘅人。」她續說因信不過，故不會把善款交給慈善機構。另外，榮雪梅在微博上載出海照泳衣照，更上載和老公的合照並寫道：「願每一個夜晚都有您相伴！」認真甜到漏！

周倩圯盛裝出席活動。

王馨平為父親健康，故禁止他喝酒。

朱潔儀靠花膠護膚

同場的朱潔儀笑言護膚大過天，「寧願買少幾件衫都要護膚！每星期都會自己整花膠燉鮮奶一次，內外都要護膚，呢個習慣維持好多年，尤其依家單身，冇愛情滋潤更加要對自己好啲！」

而王馨平表示之前和父親王羽出席《武俠》首映是一圓父親的要求及心願，更言父親健康不俗，笑言有次去飯局時，見到父親面前有杯紅酒，即好惡的責罵爸爸不應喝酒，「爸爸話佢冇飲，但我知佢係唔會拒絕人，身邊親朋都讚我啱，要對佢惡啲！以前佢多應酬，杯杯清。」她續說父親會返台灣繼續物理治療。

文：名人組