閃靚靚
時裝界中的Bling Bling元素可謂永恒不死，各大品牌設計師都愛以閃片、珠片、水晶和閃石等為服飾作點綴。但閃閃服飾卻不易Carry，因有反光作用，尤其是淺色系，容易令人看起來肥。不過，一眾自信十足的女星Model卻無有怕，以Fit爆身形演繹Bling Bling Look。名模陳嘉容就大讚大美人李嘉欣穿得最靚最耀眼，流露大方高貴氣質，而莊思敏的美人魚裝非常耀眼，可惜就未夠Bling Bling。
莊思敏
「條裙令佢嘅線條好似美人魚，不過唔夠閃，如果腰間個蝴蝶係全隻都Bling Bling，會更Sharp更醒神。」
松岡李那
「着得幾靚，條裙算係易Carry，有Cutting有線條，着上身唔會顯得肥。」
李嘉欣
「着得最靚，條裙畀人一種清爽嘅感覺，Slim Cut令身形線條好修長，設計雖然簡單但好Eye-Catching，流露高貴氣質，大方得體！」
張栢芝
「好靚好好睇，黑色Matt Colour嘅珠片唔會令人睇落太肥，而且唔係成件裙都係閃晒，而係作少少點綴，露出膊頭、手臂同鎖骨，再加埋下身透視若隱若現露出半條腿，令佢線條更修長。」
諸葛紫岐
「條裙好穩陣，但就唔特別，無驚喜。」
趙碩之
「個款好舊，好多年前已經見過呢啲Style嘅衫，同埋中國人唔易Carry到啡色，黃皮膚好易着得好老氣，要好白先着到。」
陳敏之
「好普通，好彩敏之本身身形靚，夠高線條又夠修長，條裙可以露到佢對長腿。」
陳嘉容Profile
陳嘉容，香港著名模特兒。曾為各大國際品牌行時裝騷，在時裝界打滾多年。無論是時裝方面的理論還是實戰都難不到她，近年更為電視時裝節目擔任主持，化身Stylist教人配襯衣着打扮。