朱咪咪開騷預告嚇傻觀眾

朱咪咪將於九月三至四日假紅館舉行「朱咪咪吾會玩嘢演唱會2011」，單睇騷名就知道今次演出玩味十足，她率先預告演唱會除了大玩懷舊外，更會準備一個驚喜環節，她說：「呢個驚喜環節真係好爆，觀眾最好帶定止血散、驚風散，如果有血壓高就帶定血壓藥，包你嚇到傻！」

正經唱歌被噓

咪咪是歌迷的開心果，她笑言搞笑已經是她演出中不能或缺的一部分，她說：「我試過演唱會開騷前話好想正正經經咁唱一晚歌，即刻畀觀眾噓爆我！」

咪咪入行多年，每次演唱會都會認真度橋，務求做一個有新鮮感的演出，為保住靚聲，她今年年頭已經開始戒食最愛的冬蔭功，她說：「上年失聲好長時間，後尾我去到新加坡錄節目仲被迫要咪嘴，真係一失足成千古恨。」

周圍飛呻好攰攰

咪咪坦言一直以來性格樂天知命，工作經常四圍飛的確會好攰，唯一減壓的方法是做家務及浸熱水浴，但就算幾忙，咪咪怕跟兩個仔關係疏離，只要一有假期就飛新加坡煲湯、做家務等，陪住兩個乖仔，早前媽咪不慎跌斷手骨，咪咪又飛到當地照顧，她說：「咁辛苦做嘢，都係為咗兩個仔，冇嘢比佢哋更加重要。」

採訪：卓藍

場地：海逸君綽酒店