周柏豪出動鑽戒搵老婆
潮人周柏豪自言思想傳統，將來求婚必定使出閃亮鑽石戒指做撒手鐧，不過現時仍未搵到合適的鑽戒主人。日前柏豪搶先睇英國名珠寶設計師Shaun Leane的展品，他笑言平時拎蛋撻都整碎，難怪將逾千萬元鑽石手套捧上手時戰戰兢兢！
儘管外表新潮，周柏豪的愛情觀念傳統，認為鑽石就是女人的星星，他說：「自己好少Bling Bling飾物，但就鍾意鑽石，雖然冇乜研究，但將來向女友求婚同結婚一定要有鑽石戒指，可能係父母影響啦，佢哋定情信物都係鑽戒。係女人都鍾意鑽石，就好似男人鍾意車咁。」
柏豪笑言幸好交往過的女友都未有他買鑽石，否則荷包要大出血。他又表示曾買鑽石給母親卻大擺烏龍：「有年母親節買咗對鑽石耳環送畀媽咪，先發現原來佢冇穿耳窿，幾蝦碌！」
欣賞羽毛鷹頭頭飾
英國名珠寶設計師Shaun Leane多件作品將在港舉行展覽，日前柏豪獲邀率先與展品作貼身接觸，他屏息地捧起價值逾千萬的鑽石手套，他說：「我不嬲論盡，拎蛋撻都不成原形，所以超小心。」除了手套外，他特別欣賞Leane與Alexander McQueen合作設計的羽毛鷹頭頭飾：「睇到呢件藝術品幾震撼，好巧奪天工，啲羽毛幾襯我個頭，好飄啊！」他又謂希望將來能成立個人首飾品牌，兼任設計師及模特兒。
文：專案組
攝：黎志輝
髮型：Cliff Chan@hair corner