連詩雅戒食薯片keep靚樣
新人連詩雅（Shiga）日前處女下海為護膚品拍攝廣告，屬緊張大師的Shiga為以最佳狀態示人，拍攝前一星期進行密集式保濕，甚至戒掉晚晚食薯片的惡習，Shiga又感激廣告商迫使她的起心肝做運動。
Shiga出道至今拍攝多個不同類型廣告，深受廣告商愛戴的Shiga日前憑青春健康形象獲護膚品牌LOVE IMPACT垂青，邀她拍攝新一輯廣告，首次拍攝護膚品廣告的Shiga得悉後興奮大叫，並緊張上網搜尋美白及保濕心得，更嫌自己太肥去做瘦面療程，她說：「上鏡塊面好肥，加上水腫又Baby Fat，一定要瘦面，拍攝前幾日夜晚都少飲水，又勁敷保濕面膜。」
日日做運動
極愛食煎炸食物的Shiga說：「為咗唔好生暗瘡，拍之前成個星期都唔敢食薯片，戒薯片係一件慘事，因為平時晚晚都食。」問到酬勞是否可觀？Shiga說：「作為新人算係滿意數字，其實錢有幾多唔緊要，最緊要有拍攝機會。（代價高？）唔算，反而覺得廣告商畀咗目標我，令我日日去做運動減肥。」
同異性絕緣
而近日四出宣傳新歌《讓我享受談戀愛》的Shiga被問到是否唱出其心聲？她說：「唔係，好多人都問我係咪拍緊拖，但我現階段唔渴望拍拖，依家係搏殺期。」Shiga承認入行後竟變成異性絕緣體，她說：「真係冇追求者，可能我唔出去蒲識唔到異性，依家收工就返屋企，玩開嘅朋友都係同學仔。」
文：音樂組