王晶女兒剪爛衫做o靚模
寫真大戰雖已結束，但緊接的動漫節今日拉開戰幔，眾o靚模繼續互片交「峰」。而導演王晶的千金王子涵（Ada）及「中國小姐」趙哲妤，今年亦宣布加入戰團。Ada坦言不忿被父親揶揄為「四線奀星」，故決心闖動漫節及娛樂圈，並着爛衫大晒性感。
《香港動漫電玩節2011》今日揭幕，每年的動漫節均是o靚模的上位好時機，身為已故資深電影人王天林的孫女、名導演王晶獨女王子涵（Ada），今年亦以新面孔姿態，決意加入o靚模行列！首次踩入動漫節的Ada，會擔任一個Online Game的開幕嘉賓，日前她去試Game Girl造型，並親手剪爛T恤當新衫着。
出寫真趕唔切
Ada是如假包換的「晶女郎」，卻決心闖入動漫節，她說：「唔想衰畀老竇睇，我鍾意拍戲，但老竇話我未成氣候，之前我都演過佢嘅戲，但都係閒角，佢仲話我係四線奀星，依家耿耿於懷，希望加入動漫節後，再入娛樂圈。（騷事業線？）會呀，但唔係下下騷出嚟，老竇都冇反對，仲叫我開心就做。（做o靚模？）唔介意，自己都有o靚模朋友，最緊要做好自己。」
Ada透露今年原本計劃出寫真，但因為趕不及而放棄，問到寫真大戰及動漫節均爆出不少是非，她說：「唔會用是非惹人關注。」她又暗踩有o靚模過火位：「做啲咁火爆嘅嘢又真係幾可恥，但出嚟就只係得小小關注，自己唔會咁樣做，反而做有建設性嘅嘢。」Ada還笑言要做「宅男女神」，更不介意與糖妹比較，她說：「我都識佢，大家年齡差唔多。」
Uny唔怕屠模刀
趙哲妤（Uny）繼踩入書展後，今年亦會現身動漫節，首度為Online Game做Cosplay Girl。日前Uny試了兩套戰衣拍宣傳照，她透露宣傳攤位以比堅尼為主，故屆時會穿比堅尼踩場。提到寸嘴o靚模何佩瑜（Jeana）有把「屠模刀」，Uny即反擊說自己也有「武器」傍身，她說：「到時我會拎住個『權杖』，威力仲大過佢把刀啦。（同Jeana同場？）應該唔同日子入場，但如果佢想『屠模』，叫佢嚟搵我囉。」對於有癡情狂迷向她獻花及寫情詩，Uny表示不擔心安全，還表示愈多粉絲支持就更好。
Ada's Profile
現年21歲的王子涵（Ada Wong）是著名導演王晶的獨女，祖父王天林是資深電影人。Ada身高159cm，體重48kg，三圍32、24、34，曾拍攝電影《七擒七縱七色狼》及隨譚詠麟到英國做旅遊節目等。她與賭王千金何超盈、唐貝詩等名人二代於英國讀書的朋友，交情不錯。
採訪：專案組
場地：Gamania
髮型：Zell@H.H.（趙哲妤）