蔡穎恩何思諺冇friend做
模特兒蔡穎恩（Evelyn）昨日出席新片慰勞宴時直認與樂隊Mr.成員Tom（杜志烜）分手。不過，談到好姊妹「陽光妹」何思諺（Leanne）與舊愛搭上即避而不談，又話自己有時間都希望見啲「想見」嘅朋友，似暗示與Leanne再不是朋友。
Evelyn昨與陳嘉寶（Anjaylia）、陳嘉桓等出席新片慰勞宴，由於寸爆的「不倒胸」何佩瑜（Jeana）缺席，令Evelyn甩拖一事頓成焦點。Evelyn席間直認與Tom分手數月：「我哋因了解而分開，但一直係好朋友！」
對於有指舊愛搭上好姊妹Leanne？她酸溜溜地說：「呢啲係人哋私事，知都唔講啦，更何況我唔知！（影響姊妹情？）不如你問吓會唔會影響我同Tom嘅感情！其實佢同邊個拍拖都OK，又或者我第日同Tom嘅好朋友一齊呢！」問到與Leanne是否久未碰面，她即「起晒弶」：「我忙到屋企人都少見，都希望見啲『想見』嘅朋友！」似有弦外之音。
澄清冇人追求
對於被傳與本地插畫家小克出雙入對，Evelyn激動地說：「依家冇拍拖，再係咁寫我冇人追！」並澄清與對方只是兄妹情：「佢係比親生哥哥更親嘅人，加上佢結咗婚兼大我一個『耷』，冇可能！（影到你同台模甜蜜遊街？）嗰個係公司新人！」
冒死跨境行冰
另一邊廂，Leanne與歌手文恩澄早前為電台拍攝紀錄片，Leanne自爆當時冒着嚴寒及被俄羅斯士兵射殺的危險，由黑龍江結冰的江面上徒步跨越兩國邊界，未知Tom事後有否「呵番」？文：影視組