Alina拋導彈香艷餵粉絲

模為谷寫真認真搏命，繼日前Jeana跳海、趙哲妤撕寫真、「馬交吳佩慈」Ealine派壯陽藥後，𡃁模組合冬甩昨日再獻新猷，派出「E Cup官恩娜」何綽菲Alina低胸餵宅男，認真香艷！

五分鐘掃光

冬甩成員胡心諾（Rainbow）、陳芷敏（Elke）及Alina昨日遊勻港島為寫真造勢，先到銅鑼灣鬧市派冬甩及海報，吸引大批粉絲爭奪，穿上低胸吊帶裙的Alina更力谷E Cup導彈搶鏡，有部分幸運兒更獲Alina親手餵冬甩，一早預備好的幾打冬甩及海報，五分鐘內被旋風式掃光。

冬甩現身銅鑼灣鬧市派冬甩，引來大批粉絲喪搶。	Rainbow派海報，阿叔唔執輸。	冬甩去完銅鑼灣，即趕去金紫荊廣場派糖，死忠金毛粉絲兩邊都去勻。

派糖甜蜜蜜

其後三女匆匆換衫抵達金紫荊廣場派糖，可惜反應麻麻，只吸引近十名粉絲到場攞糖，其中更有金毛粉絲由銅鑼灣跟到灣仔支持，認真「死忠」。問到其他𡃁模宣傳手法層出不窮，她們派糖似略嫌單調，大師姐Rainbow說：「我哋唔會搵命博囉，可能依家太曬，所以少啲人。」Alina強調冬甩走健康青春路線，派糖就如她們形象般sweet！

文：專案組