葉翠翠怕濕洩春光三重打底
葉翠翠和韋家雄日前在上環為新劇《4 In Love》拍淋雨戲，翠翠事前做足準備，三重打底防「濕身」走光，她說：「條裙特登揀深色，驚淺色濕咗會透。除咗Tube Top外仲加埋底衫、背心、短褲防走光，雖然熱啲但最緊要安全。」
翠翠未拍淋雨戲先興奮了幾日，她說：「我好期待呢場戲，一路都想試十號風球喺街淋雨嘅滋味。」拍攝時翠翠與韋家雄齊齊淋足三個鐘，雖然她大呼好玩，但卻險在大熱天時冷病，她說：「有部好大嘅吹風機製造橫風橫雨效果，冇諗到啲雨咁大，估唔到夏天淋雨都咁凍，好在工作人員一停機即攞毛巾畀我披住，但係返到屋企都要即刻飲薑茶暖身。」