祖兒自嘲平胸有市場
樂壇天后容祖兒形象健康，手上有不少代言人合約，她坦言除了電器、護膚品、女性用品等之外，近日更收到奶樽及木門的廠商邀約，令她摸不着頭腦，幽默的她自嘲：「可能我同度門一樣咁平實，夠晒實淨堅固！」
祖兒、模特兒Alice B.、陳奐仁等昨日出席網站頒獎禮，一向廣告接不停的祖兒，連續五年獲大會頒發最佳代言人獎項，難怪祖兒表現雀躍，以軍綠色心口開窿連身裙盛裝出席，與同場獲頒「搜尋人氣品牌廣告代言人」的Twins有講有笑，阿Sa個人更獲頒「廣告代言人大獎」，雙喜臨門。
另類手法sell內衣
祖兒受訪時坦言感覺有如得到「最佳女主角」般：「拍廣告每個品牌、每個廣告商要求嘅內容都唔一樣，有時要跳舞、有時要扮女俠，好多唔同嘅挑戰o架！」她又稱除了護膚品、電器、女性用品等代言合約在身外，近日更收到奶樽、木門等廠商以七位數字酬勞邀約成為代言人，令她完全摸不着頭腦，她笑說：「真係好層出不窮，可能我同度門一樣咁平實，夠晒實淨堅固，（咁奶樽呢？）通常啲媽咪餵唔掂人奶先用奶樽o架啫，係咪？哈哈！不過經理人話係因為我皮膚白喎！（咩廣告會推？）真係冇乜喎，其實內衣廣告我都可以拍呀，不過外面會着衫，呢個係幾特別一種推銷手法吖，最緊要係得到大家注意力啫！」
潮人葛民輝及「第四代Canon女」Alice B.獲頒「廣告代言人大獎」，Alice B.腳踏五吋高踭鞋踩場，明艷照人。
採訪：音樂組