Jeana出動大姨媽暗寸篤數
寫真大戰踏入第三日，陳靜（DaDa）昨日率先公布其寫真集銷量於首日銷量稱冠，歡迎大家查數！何佩瑜（Jeana）得悉後擺明唔抵得，寸爆指其大姨媽仍見大量DaDa寫真有得賣，暗指對方篤數！
DaDa昨日在微博透露其寫真集在書展首天銷量第一，若不信可去發行商查詢。DaDa接受電話訪問時透露，其代言美容院老闆娘會買一萬本以示支持。提到Jeana自言銷量達五千本，DaDa說：「如果係就恭喜佢，今日係第二日，大家都要繼續努力，最緊要出嚟效果理想，我第幾位都咁開心！（叫人去查數係咪怕被指篤數？）冇事實根據唔會亂認第一，我知係第一日第一，第二日係點都未知！」
坐遊艇造勢
眼見銷量比不上DaDa，Jeana未有大方恭賀，反而暗寸對方篤數：「但係我啲大姨媽仲見到好多書（DaDa寫真）喺度喎！（怕比較？）我好少蝦啲失敗者！」Jeana又在微博自稱寫真集一度斷市，現正火速加印。
另外，Jeana和Hidy昨日坐遊艇出海造勢，Hidy玩輸遊戲被罰跳海。兩女在岸上大派紅酒及清水，有小朋友向Jeana索取紅酒時即被問是否夠十八歲。期間有男途人高聲大叫：「得啲波皮，冇乜好影？」現場有過百傳媒及途人圍觀，非常混亂，甚至有人打爛紅酒。
提到許穎前日「胸」降會展，Jeana表示自己宣傳排場贏對方，更說：「佢適合去日本拍戲如三級或恐怖片，祝佢大紅大紫。（連日來你冇講佢？）唔係唔講，係唔記得佢！」她拒絕效法許穎送穿過的泳衣，質疑對方未洗乾淨。
碩之拒賤賣
一直被Jeana咬住唔放的趙碩之昨日封胸到會展攤位，大派總值四位數字的利是慰勞員工。她表示獲朋友告知Jeana的寫真集在網上團購只需一元：「我唔想賤賣，賤賣冇意思！」碩之精裝版寫真附送其設計的36D胸圍，她笑言：「都係身上用，可能都戴喺頭！」此外，林青霞的《窗裏窗外》在會展前日只售出一千本，但據其出版社透露，單是昨早已賣了二百本。
文：名人組