王菀之急覓意中人試做老婆

Ivana不覺已入行六年，身為唱作人的她當然亦有缺乏靈感的時候，有時她會聽他人的愛情故事激發靈感，並會多看電影來刺激幻想。Ivana直言對愛情充滿憧憬：「雖然見日日相處得好嘅人唔多，特別係依家呢個年代，但我依然覺得有呢個機會，大家會過得開心、浪漫。」

常藉訪問當徵婚

Ivana絕少被拍到與男生外出，緋聞傳來傳去亦只得張敬軒一人，感情世界可算空白，當問到會否逼自己覓得真命天子時，她隨即慨嘆道：「有得逼至得o架……我已經成日訪問當徵婚㗎喇，其實做人太太都幾好呀，雖然我身邊本來好熱衷結婚嘅朋友都已經放棄，但我覺得人一世物一世，點都要試吓做人太太，個名份同責任都唔同！」

對於擇偶條件，Ivana表示：「最緊要有幽默感同心地好，仲要大家價值觀相同先得，如果唔係會好冇趣味！依家大個咗會知對方啱唔啱，謹慎咗，因為唔想浪費大家時間，冇咗嗰份衝動。」

Ivana的外表雖然看似柔弱，但原來面對失戀時卻非常堅強，更勉勵女生要有自己時間及興趣：「我都試過有一個勁衰男友，不過自己係偏向堅強嗰邊，所以冇話放棄自己或者超級頹廢，因為人生仲有好多嘢可以做，冇男朋友唔係世界末日！女仔最好有多啲興趣同有番自己時間。」

採訪：音樂組

攝影：倪立煌

化妝：Milk Yuen

髮型：Kate Shek@ Hair Culture

服裝：Beauty & Youth by I.T.