甄子丹無權造人老婆話晒事
身為「宇宙最強」的甄子丹，在銀幕上以一敵十，但現實生活中卻是英雄無用！片酬起碼過千萬的甄子丹自言身無分文，所有收入全交由太太汪詩詩操控外，就連想再「造人」的話事權也沒有，名副其實的老婆奴！
影星甄子丹昨晚偕同愛妻汪詩詩出席美國著名牛仔褲品牌True Religion Brand Jeans於中環ifc開設首間專門店的開幕活動，同場並有大家樂太子女陳浩寧與男友、扒女李依琳、名模Alice B.、Mandy Lieu、Joceyln等，而子丹更和品牌高層一起主持揭幕儀式。自言現在休息中，稍後和妻女到美國放暑假的子丹，最快到年尾才拍戲，直言現在難得一享親子樂，自己比子女們更加開心，閒時可跟兒子踢波玩樂。已有一對仔女的子丹被問到可會再造人時，他即說：「我就想，不過太太話太辛苦喎！」
曾跟張栢芝拍戲的甄子丹，被問到對鋒芝婚變的看法時，他直言當時跟栢芝全無對手戲，故未有評論，但卻分享和太太的相處之道，直言兩人要用心經營，別太多計算及計較，更直言自己是身無分文！子丹說：「我所有錢都畀晒太太，零用錢都係啱啱夠用，其實平時我冇咩錢使，自己又有好多sponsor，又唔使成日出街，返屋企又有老婆煮飯食。就算出街使錢都係老婆負責畀，佢依家仲有錢過我！」
唔慣老公喺身邊
同場的汪詩詩說老公雖難得休息可享天倫，但笑言不習慣：「因為慣咗佢成日唔喺身邊，不過佢喺度都好，可以畀佢見到我喺屋企有幾咁忙，我都好辛苦！而佢又可以陪仔女彈琴打波。」至於子丹大呻被拒再造人，詩詩說：「兩個係好夠，不過唔一定冇第三個，如果有得揀都想要個女。（好似細仔咁嚟個意外？）嗰次唔係，係咁啱奶奶話屬豬幾好我先試，一試就有。但係唔會有意外，我好安全！」
文：名人組