卓韻芝猴擒中女胸襲黃宗澤
前電台主持人卓韻芝前晚舉行處女棟篤笑，請來早前被拍到在家「赤條條」的黃宗澤（Bosco）任嘉賓，年屆三十二歲的阿芝對Bosco嗒晒糖，更伸手摸對方「巨胸」達一分鐘，並高呼：「好硬呀！」
卓韻芝（阿芝）一連六場《死去活來One Night Stand》棟篤笑前晚開鑼，吸引田蕊妮及徐子珊捧場，邀得早前被偷拍準備沖涼全裸的黃宗澤任嘉賓，阿芝以「好想摸佢個胸」介紹對方出場，並即一輪嘴取笑對方與胡杏兒的戀情，又將對方推落梳化。
已達中女級別的阿芝對Bosco非常猴擒，先情深望住對方，之後又趁機將手搭在對方膊頭，雙眼多次放電，搞到Bosco極度尷尬，最後更開口問Bosco可否摸他的「巨胸」？Bosco無奈說：「你今日大晒。」阿芝食住個勢從Bosco衫領伸入「抽水」，並講有味笑話：「入咗去郁唔到。」接住又說：「我抽出嚟喇。」摸足成分鐘。事後，阿芝說：「好硬呀！」
爆MJ偷用眼線液
阿芝又踢爆前男友樂隊Mr.成員MJ經常偷她的眼線液用，她說：「用完又唔合埋個蓋，女人最怕乾，我成日買波鞋、波褲畀佢，佢唔着反而攞我啲裙着。」勇於面對錯失的阿芝又提到當年自殺原因及經過。
採訪：音樂組