Eason扮超人爆頭縫5針
陳奕迅（Eason）愛女康堤撞爆耳，Eason乘機大爆自己童年奀皮事件簿，曾飛樓梯扮超人，撞爆頭入院縫針，直指受傷是成長經歷，笑童年時常出入醫院。
陳奕迅、何韻詩、趙碩之及前有線女主持林熹瞳等前晚出席《功夫熊貓2》首映，Eason直言陪完女兒康堤看醫生趕來，問到小康堤情況，他說：「OK嘅！意外嚟啫，唔使縫針，只係耳仔腫咗，我有氹佢。」同時自爆年幼時奀皮事件簿，包括飛樓梯扮超人，撞爆頭要縫五針，小學第一天又撞傷眼角縫四針，7歲多和哥哥玩又撞爆頭，笑言自己是醫院常客，更視為成長過程的一個階段。
講完囡囡受傷，Eason更代妻回應性感游泳事件，他說：「使乜理呀，佢哋去游水都唔係第一次，我哋同Kevin Poon成班好朋友，我出埠佢哋出去都好正常，難得咁好天。」
碩之反擊Jeana
另外，性感撐場趙碩之，被問到寸爆o靚模Jeana嘲其岩石胸，不甘示弱地說：「我唔係好介意，不嬲唔知咩叫岩石胸，淨係知咩係真胸同假胸，（你覺得Jeana係真胸定假胸？）唔評論，（好多人話佢假喎？）就算假都可以好靚，我睇女仔人品重要啲，（覺唔覺佢周圍辣火頭？）佢唔怕熱咪OK囉，最緊要唔好燒親人，燒親自己唔緊要。」
文：影視組