克勤酒店隔離 免囝囝傳染
李克勤昨日擔任歌星領隊，率領梁漢文、官恩娜、薛凱琪、張繼聰等出席「903 ALL STAR運動會」記者會，身為領隊的森美烈日下穿西裝上陣，熱到標汗，相反克勤就以薄西裝襯及膝褲，清爽得多。
克勤說：「出門口前老婆問我着乜？我話大會要領隊着西裝，老婆話仲有幾日開騷，快啲換番條短褲，怕我中暑。而且囝囝感冒發燒，個唱期間我會搬去酒店，自己隔離自己，囝囝可能會睇中間場數。」對於同門的陳奕迅已續約環球，將約滿的克勤說：「我過咗演唱會先，但成數高唱入雲，最好喺沙灘搞記者會，我都有32A微波事業線o架。」
此外，梁漢文、張繼聰等與DJ隊進行足球五人賽，結果歌星隊以8:2大勝；同場的官恩娜以排球女將look現身，露長腿的她搶盡同場女歌手風頭。