(12)林志勇夠殺氣膺票王
11位候選港男昨日出席活動爭做武狀元，他們穿上背心晒手瓜，並隨手拿起兵器一顯身手，但見大多數都不擅武藝，亂打一通！(3)黃建東無啦啦表演騎呢舞姿，(5)江俊霖則亂耍醉拳，(6)方世杰求其玩劍擊，令人冇眼睇！較為突出的要數(8)鄧嘉傑戴上拳套大跳霹靂舞，又倒立又凌空定杆，獲得評判李亞男及何傲兒賞識，至於(9)舒宇則最有功架，而(12)林志勇眼神凌厲甚有殺氣，而且全程谷行肌肉十分投入，最後成功獲最多市民票選成為武狀元。
李亞男唔會失控
李亞男賽前表示睇好(1)蕭家浩，因對方似蕭正楠，問到會否出席決賽夜？她說：「未知！不過我好冷靜，唔會失控！」雖然面對一眾猛男，但她仍心繫男友王祖藍。胡定欣則睇好(4)余沛林，因曾與對方跳拉丁舞：「覺得佢好內斂，知佢參選我都好驚訝！我覺得港男要着泳褲，比選港姐更勇敢！」雖然她表示會對余沛林偏心，但最後卻選了(9)舒宇。
定欣聽豪仔傾訴
提到楊思琦與李泳豪分手，定欣透露日前有聽豪仔傾訴，知他甚為失落，但勸喻他要靠自己解決，對於雙方掀起罵戰，她認為應盡快停止：「感情始終係私人事，唔使向公眾交代，搞到咁複雜！」亞男則表示跟思琦較熟，會祝福對方：「尊重佢嘅決定，始終對象係對成世。」
文：影視組