陳奕迅好服務幫粉絲執毛

【衛紫敏廣州直擊】大忙人陳奕迅早於2月推出新碟，直至昨日才有空檔到廣州搞簽名會，吸引2,000粉絲逼滿商場三層樓，排頭位的粉絲晨早7點霸位。當Eason見到場面墟冚，忍不住問大會攝影師借相機，親自拍下粉絲畫面，合照時更擺出瑜伽甫士金雞獨立，十分搞笑。

陳奕迅站在粉絲前面金雞獨立，甫士惹笑。	陳奕迅指着枱上的假眼睫毛大感驚訝。	商場聚集了逾2,000人，希望一睹「吹神」風采。

全場粉絲興奮吶喊，大叫他的花名「吹神」，還熱情地要求他唱歌，Eason徇眾要求清唱了兩句《IQ博士》。Eason見粉絲太多，一早聲明只會簽名不寫抬頭，但粉絲仍把握機會跟他握手。簽名期間，Eason竟在枱上發現粉絲甩掉的假睫毛，他搞笑地執起，引來全場笑聲。

提早到捧Karen場

Eason接受訪問謂前晚提早上廣州捧首次在當地開演唱會的莫文蔚場，問是否Karen宣布結婚後首次見面？他說：「唔係，之前喺香港同鄭伊健、蘇永康約過佢食飯，Karen本來想請客，但梗係我哋三個男人畀錢，賀佢攞金曲歌后啦。」

此外，Eason稍後會繼續大陸巡唱，不過，將於27日踏入37歲生日的他，一早已申請放假，他說：「每年生日都會請假，今年放2星期，因為囡囡都放暑假，難得三仔乸一齊放暑假，我哋會去旅行，由老婆安排地點。」