超儀碌爆友情卡 開船P拍MV

何超儀早前為拍MV出動屋企千萬遊艇,更碌爆人情卡,邀請了60人上遊艇營造大堆頭派對場面,梁漢文因有工作在身未能配合開遊艇時間,超儀二話不說另找接駁小船載他到海中央上遊艇,王凱韋(前名:王合喜)則在海上巧遇超儀,即被超儀拉上來幫手當「臨記」!

何超儀(Josie)一向醉心拍戲,並投資金錢做電影老闆,近年,Josie再向樂壇進發,並以「Josie & The Uni Boys」樂團名義,推出迷你專輯,日前,超儀便出海為專輯兩首新歌《黑超》、《天眼通》拍攝MV。

邊拍邊玩夠真實

對工作要求甚高的她,拍MV亦十分認真,因想拍出大堆頭、派對feel的感覺,Josie特別向屋企商借千萬遊艇,又勁碌友情卡,包括梁漢文、陳奕迅女兒、谷德昭等共六十多位朋友上遊艇開懷舊派對,大家邊拍邊玩,超儀更準備大量零食,令眾人玩得開懷,效果夠晒真實,超儀更high到自拍嘟嘴照(小圖),流露可愛一面!

海上硬捉王凱韋

超儀好友之一梁漢文因在拍MV當日有工作在身,但為了超儀,都不惜抽半小時幫拖拍攝,不過由於梁漢文未能配合開遊艇的時間,故到碼頭時已無艇搭,超儀特別為他找了一隻小駁船,載他到海中央來上遊艇。拍攝期間,剛巧遇上王凱韋在海上玩滑水,超儀當然不會錯過機會,「捉」了他上船充當「臨記」,最後成功拍出營造大堆頭派對場面!

文:影視組