Melanie Z.逼愛人齊養曱甴
不少人都喜歡飼養寵物，但第三代Canon女Melanie Z.的寵物就與別不同。昨日她出席時裝騷時，自爆喜歡昆蟲，曾飼養蟑螂，連大喊怕怕的男友也要愛屋及烏，令人側目！
第三代Canon女Melanie Z.與中國女模戴小奕昨日為香港時裝節的香港設計新力量—「穿梭時‧光」擔任首日時裝騷的模特兒。想不到外表斯文的Melanie，原來喜歡飼養蟑螂，嗜好認真特別！Melanie透露以前在加州讀書時主修昆蟲學，所以對昆蟲甚有研究。問她養過甚麼昆蟲時，她語出驚人說：「我養過蟑螂同螳螂。我男友雖然好高大威猛，但好驚蟑螂。（佢有冇叫你唔好養？）無，我仲教佢正確嘅飼養蟑螂方法添！」其後Melanie開心表示將有機會到熱帶雨林採訪及介紹昆蟲：「我會做一個電視節目，要飛去外地工作，好開心，因為我好鍾意旅行。」
兩星期不見掛到出口
至於戴小奕同樣行程緊密，她將要到新加坡及北京工作，問到會否被男友投訴太忙？她笑言：「我哋大家習慣咁嘅模式相處，大家喺唔同城巿，我同佢有兩星期無見喇，都好掛住佢。」小奕稱計劃與男友十月到英國旅行，一解相思之苦。
趙嘉懿欲母子檔行騷
另外，名模趙嘉懿（Carrie）則為國際時裝巡禮擔任模特兒，並獲趙爸爸到場支持。Carrie稱將會帶同十四個月大的兒子捧自己場，問她會否再次以母子檔上陣行騷？她笑言：「都想呀！囝囝好有表演欲，佢聽到音樂就想跳舞。（會唔會追個女？）會，我好鍾意囡囡，但過兩、三年先啦，等囝囝大個啲先。我想生一仔一女，但我老公就想我生四個囉。」
提到舊愛李璨琛宣布將結婚，Carrie大方祝福對方幸福快樂，並表示若對方請她飲，只要時間許可，她也會到賀。
文：名人組