莊思華蒲老蘭捲晒馬風波
名模莊思敏的胞妹莊思華（Mona）繼上月初捲入襲擊疑案後，前日凌晨又再捲入爭執糾紛。Mona與聲稱已分手的名練馬師告東尼兒子告崇恩（Sean），被爆在蘭桂坊夜蒲時與人發生爭執，現場集結逾20人，最後驚動警方到場了解，警方列作爭執案件處理。
莊思敏胞妹、港姐季軍莊思明孖生姐姐莊思華，繼上月初與Sean夜蒲捲入懷疑襲擊案後，前日（3日）凌晨再捲入爭執案件。凌晨四時許，見到Mona與聲稱已分手的Sean，在中環蘭桂坊夜蒲時與人發生爭執。
Sean細心輕托纖腰
據悉有人在酒吧內起衝突，被店員勸喻離開，之後雙方在威靈頓街「米蘭站」對開各集結十多人，有人甚至企出馬路，險象環生，現場所見，Mona當時正捉實一名男性朋友的手，與Sean及其他友人似在勸交。事件因驚動警方，當Sean與Mona及另一男性朋友甫見警車到場，即急急腳搭的士閃人離開現場，而上的士時，Sean還細心輕托Mona纖腰。由於事件中冇人受傷，一干人等最後和平散去，警方列作爭執案件處理，冇人被捕。
咁啱相遇搭順風車
雖然Sean早前曾承認與Mona已分手，但兩人再被爆結伴夜蒲，令人揣測是否「翻撻」轉玩「地下情」？Mona接受本報電話訪問時否認捲入爭執事件：「唔關我哋（指她和Sean）事，係我哋朋友嘅朋友同女朋友有拗撬，可能啲人見我哋熟口熟面，就入咗我哋數，完全唔關我哋事。（你同Sean已經分手？）可以咁講，但冇乜特別分手原因，再見亦是朋友，我哋有共同朋友，間中會出嚟見面。」
Mona再強調當晚與Sean在夜店巧合相遇，她說：「當晚我同Sean喺夜店咁啱撞到，並唔係事前約埋，我哋寒暄一陣後，就同其他朋友離開。之後我哋同另一個朋友一齊搭的士，其實佢（Sean）只係搭順風車，搭咗兩個街口就落車，佢坐司機位旁邊，我同個男性朋友就坐後面。」
莊思華Profile
莊思華（又名：莊寧）
英文名：Mona Ch'ng
出生日期：1987年2月15日
背景：父親為馬來西亞拿督莊寶，母親為亞視藝人江玉珠。胞姐是名模莊思敏，孖生妹妹莊思明是去年港姐季軍。Mona曾拍電影《初戀嗱喳麵》及《双子神偷》，04年曾當許冠傑的Sam's Angels。
告崇恩Profile
英文名：Sean
年齡：27歲
背景：父親為名練馬師告東尼，曾到英國修讀經濟，回港後自立公司行商。
文：專案組