王祖藍寧嫁耶穌唔娶李亞男
王祖藍昨日以一身傳統中國禮服舉行記者會，宣布八月十九至二十日舉辦《王祖藍咪咁扮嘢演嘢會II》，會上宣布廿一日加開日場。祖藍透露演嘢會會將灣仔伊館化身為大酒樓，搞到好似結婚飲宴一樣，在台上大講愛情，他說：「今年真係太多人結婚，我一個月去七單，同埋講吓愛情嘢、初戀、離婚等等，（鋒芝婚變會唔會講埋？）未必會針對個別娛樂圈新聞，但係會講個社會現象。」
問到其女友李亞男會否上台？祖藍坦言對方是愛情路上的一部分，他笑言：「今次我係嫁畀耶穌，新娘不是佢，佢會係賓客之一，都會上台，因為佢都係愛情路上一部分，（順便求埋婚？）唔會喇，佢話唔准結婚住，我都係過吓請飲癮啫！（求婚不成功？）唔係，未求，等事業工作穩定先啦，未係時候！」
減少扮女人
祖藍透露演嘢會上將會有多個造型出現，但扮女人環節就會減少，今次特別開日場，希望迎合小朋友的口味，他說：「上次有兒童不宜內容，點知日場見到大部分都係細路仔，今次真係合家歡題材，啱晒闔府統請，抵啦，平時去飲公價都要五百蚊啦，我最平門票一百五十蚊就有喇！」
採訪：音樂組