施明聞分手血壓飆升
李泳豪、楊思琦分手，李家兩老李家鼎、施明及大細孖都被蒙在鼓裏毫不知情，直至昨日思琦單方面向外公布，李家上下恍如晴天霹靂，「過氣奶奶」施明接受電話訪問，坦言血壓上升，很擔心「細孖」泳豪刻下的情緒狀況。
施明昨午與「大孖」泳漢齊齊出席公開活動，當時已有記者向二人查問「細孖」泳豪與思琦分手的睇法，兩人不約而同一臉錯愕，「大孖」泳漢隨後代答：「我要返去了解吓先，真係唔知發生乜事，如果隨便答會對佢哋唔公平。你哋咁講，我好擔心細佬嘅情緒，我哋近排好少見，佢忙住為事業打拚。（好耐冇見思琦？）我唔記得幾時見過佢，但印象中唔係好耐之前啫。」
事後記者再致電施明，她說：「知道思琦講咗，一時間好難接受同消化，我依家隻眼紅晒，相信係血壓高，我行唔到路嘞。」至於李家鼎同樣不敢相信事實，並無奈地表示很難理解年輕一輩的感情世界。