DaDa大方任摸冇打假波
將於暑假推出寫真的「百果園咪神」陳靜（DaDa），雖面對潘霜霜、張馨予等內地乳模威脅，但她自言身材天然，故信心十足；而她的經理人施念慈亦表示，曾親自摸旗下囡囡的胸，驗證個個真材實料。
陳靜昨日在經理人施念慈（Celia）率領下，與四位師妹李宥彤（Liz）、梁雅淳（Bambi）、鍾采羲（Iris）和蔡瑩瑩（Ivy），以學生Look出席一個兒童網站開幕活動。原來Celia是今次活動的顧問，她說：「搵番自己囡囡方便啲，同埋今日係校服Look，唔係Sell身材，遲啲可能會安排佢哋唱兒歌。」
搞三場簽名會
戴上粗框眼鏡的DaDa表示早前被貓貓抓傷眼角膜，現已好了不少，她又笑言一身造型被人指似老師多過似學生。提到即將推出寫真，她說：「書展有得賣，希望賣得好啲，我會喺出面搞三場簽名會，書展未必簽到。今次性感尺度同上年個月曆差唔多，激過上年本寫真。上年我哋比較守秩序，冇入到書展，自己都想入書展睇吓書。」
DaDa坦言對內地的潘霜霜和張馨予甚感興趣，好說：「多緋聞嗰幾個，想睇吓人哋影成點，比較吓。（怕唔怕身材輸蝕？）佢哋好勁，但我對自己都有信心，最撐自己係天然，不過唔係話佢哋唔係天然，樣就見仁見智。」
唔會屹立不倒
Celia亦力撐DaDa一眾囡囡：「我都支持佢哋，個個都真材實料，我都試過隔住衫摸佢哋，同埋出Trip時佢哋喺房度着得比較少，見佢哋瞓低時個胸唔會屹立不倒，係真材實料唔怕比較。」