吳君如身教 愛心傳囡囡
演藝事業持續近廿年，經歷過風風雨雨，得過影后寶座的吳君如，如今是一女之母，熱心慈善活動的她坦言從中得到很多，女兒亦因此學習到有一顆慈善心，希望女兒日後可以看到一個美好世界。
君如連續三年擔任「奧比斯兒童大使」，早前便到訪越南，她坦言每次探訪的感受都不同，總能於不同的地方帶走一點點的經歷，今次令她學懂更知足。
家人健康 最大幸福
去到當地醫院見到男女老幼嘅病人，全部瞓喺密密麻麻嘅病床上，衞生環境極差加上有病，令佢哋嘅痛苦沒完沒了。想要熱水但只得暖水，醫療設施唔足夠，我探訪短短五日已感到辛苦，但同佢哋比真係微不足道，所以我覺得香港人好幸福，返到屋企就會滿於現狀，雖然我哋成日話人望高處要過更好嘅生活，但其實有咩緊要得過同屋企人嘅關係同埋佢哋嘅健康呢？
善事不是每個人都有心去做，君如覺得做善事要自發性，好似香港人就善心無限，認真無得頂。
港人善心長捐長有
我覺得做善事係無得逼嘅，一定要出自內心。不過我都會叫朋友捐錢，有時佢哋仲會搞笑同我講：「我都好窮架，你捐啲畀我啦。」所以都係隨心啦，佢哋鍾意捐幾多就捐幾多。而香港人嘅善心喺亞洲嚟講真係數一數二，捐極都仲有，遠至美國近至內地同台灣都捐。個世界一有咩天災人禍，香港總會籌到一億幾千萬捐出嚟，日本地震以為佢哋咁有錢唔使捐啦，點知又籌到咁多，真係冇得頂。可能因為香港人惜福，相信因果循環，同埋我哋無咩天災，所以咁闊佬。其實我哋細細個都畀人灌輸要助人，所以次次籌款都不遺餘力，香港人真係好掂。
近來君如出席活動時都會帶女兒於身邊，眼見這個五光十色的世界，小女兒未有貪得無厭，更盡得一顆如媽媽一樣的善心。
不重物質 節儉助人
我做完探訪返去會同個女講佢已經好幸福，佢都明嘅。佢好乖唔會要求我買玩具，反而係我成日忍唔到手買畀佢，有時同佢行街話買衫畀佢，佢會話：「走得未呀？」佢知道呢個世界上有人出世就冇父母，有時又會問我點解有啲人講同聽嘢都唔係咁清楚，不過佢好彩咩都齊全，仲識得話自己係最靚。依家學校又會教佢幫人，雖然佢冇一個概念要捐錢，不過有啲書佢睇完就會帶番學校捐畀一啲有需要嘅團體，我覺得咁樣係好嘅。
「奧比斯」主要幫助有眼疾的病人，眼睛乃靈魂之窗，女兒如今看到的是一個簡單而純真的世界，不過待她長大以後，時代就會變遷，君如希望她可遇到好人好事。
其實世界一路都變緊，我哋做父母係控制唔到。以前係慢同單純，人與人之間嘅感情好簡單，好易開心，永遠都會記得自己有能力去買第一樣想要嘅嘢。依家個世界資訊發達，令我哋知道有好多天災人禍，避唔到，我會解釋畀個女聽。不過希望佢可以遇到好人好事啦，只要佢開心對社會有貢獻就得喇，唔使話志願做大醫生律師，發揮到自己就OK！
口述：吳君如
筆錄：小花
攝影：劉智源
Hair:SimmLui@Orient4.com.hk
Makeup:chu make-up